September 1, 2022; Integrated Disease Surveillance Project (IDSP) state nodal officer Dr. Pachuau Lalmalsawma chuan Mizoramah monkeypox kai rinhlelh an la awm loh thu leh Japanese Encephalitis (JE) natna vei hmuhchhuah belh an awm lo tih a sawi.

ZALEN zawhna chhangin Dr. Pachuau Lalmalsawma chuan monkeypox leh tunhnai a India ramin a buaipui pakhat Tomato flu chungchangah, a vei/kai rinhlelh Mizoramah an la awm lo tih sawiin, National Centre for Disease Control (NCDC) ah rinhlelh endik tura sample thawn pawh an la nei lo tih a sawi.

Hetihlai hian tunhnai khan JE natna vei pakhat Mizoramah hmuhchhuah a lo ni tawh a, hemi chungchangah hian Dr. Pachuau Lalmalsawma chuan, midang JE vei hmuhchhuah an awm belh loh thu leh rinhlelh sample endik tura thawn pawh an neih lo tih a sawi a, JE vei hmuhchhuah chu Aizawl khawpui pawn lam mi a nih thu te, a chhungte leh a chenna veng/khua te an endikna ah pawh JE vei rinhleh tur an awm lo niin a sawi.

Media hrang hrangah tarlan a lo nih tawh angin, thla liam ta August thla laihawl vel khan Mizoramah JE natna vei hmuhchhuah a lo awm tawh a, JE natna chungchangah Mizoram sawrkar chuan thuchhuah siamin, natna thehdarhtu thosi culex chu Mizoramah a tam thu leh, JE natna laka inveng tur chuan thosi seh pumpelh a pawimawh ber tih an tarlang.