Billboard Awards 2021 sem chhuah inkhawmah sawm loh ni chunga chawimawina pathum dawng thei, tun laia country singer lar mek, Morgan Cole Wallen hi May 13, 1993 khan Sneedville, Tennessee-ah a piang a. A naupan lai atang tawha rimawi lam ngaina niin piano leh violin tum a zir a. College a rahhnuah erawh baseball a khel ve lawp lawp thin a; mahse, a kiu a tihnat tak avangin a lo ngainat hmasakah kir lehin hlawhtlinna a chang chho ta a ni.

Wallen hian hla a phuah thiam hle bawk a, a lar chhuahna chu zai thiam zawnna, The Voice season ruknaa a tel atang khan a ni a. Intihsiaknaah hian zaithiam hriat hlawh, Usher-a team-ah a tel thin a, a hnuah Adam Levine-a team-ah a tel zui leh a. A che tha vak lem lo va, playoff-ah a tla a; mahse, Panacea Records chuan thawhhona thuthlung ziahpuiin a EP hmasa ber, Stand Alone chu kum 2015 khan a tichhuak ta a ni.

Kum 2016 khan Wallen hi Big Loud nen thawhhona ziak lehin a album hmasa ber, ‘If I Know Me’ pawh he studio atang hian kum 2018 a tichhuak ve ta a ni.

He album-ah hian single-a a tihchhuah, ‘Up Down’ (Florida Georgia Line nena an sak), ‘Whiskey Glasses’ leh ‘Chasin’ You’ te pawh telin hriat a hlawh hlawm hle.

‘If I Know Me’ hi Billboard Top Country Albums chart-ah No. 1 hial a kai phak ta a. A album pahnih, ‘Dangerous: The Double Album’ chu kumin January khan a tichhuak leh a, hei phei hi chu a hlawhtling zualin tunah pawh a hlawhtlinna a la kal mek zel.

A album pahnihna hi February thlaah meuh chuan kum 64 zet hnua country album zinga Billboard 200-a chawlhkar sarih chhung No. 1 nihna hauh leh thei hmasa ber a ni ta hial a ni.

No. 1 dinhmun hi chawlhkar sawm zet a hauh va, Whitney Houston-in kum 1987-a ‘Whitney’ tih hmanga chawlhkar sawm No. 1 nihna a hauh zawn hnua a hmasa leh ber a ni.

A album hnuhnung zawkah hian Billboard No. 1 single ‘More Than My Hometown’, ‘7 Summers’ leh ‘Wasted on You’ te pawh a tel.

Wallen-a hi lar hle mah se neuh neuh a nei nasa ve a. May, 2020 pawh khan Nashville-a Kid Rock-a ina a luh avangin man a ni a, Saturday Night Live-a a inlan tur pawh thulhtir a ni tawh a. Chanchin mawi vak lo a nei ve nual.