Aizawl June 29, 2023 : Nilaini zana Aizawl West College bula motor-in a hnawl avanga boral K. Zorinsanga s/o K. Fangzauva (L), Khumtung chu post-mortem a nih hnuaha an khuaah phur thlen niin vawiin khan vui nghal a ni.

K. Zorinsanga sutu motor, Bolero Pick-Up hi a brake a fail nia sawi a ni a, Motor hi a brake a fail ngei em tih endik turin MVI te hnenah dah a ni tawh. A driver hi a rui nia sawi a ni a, mahse, Traffic lam atanga ZALEN thudawnna chuan test result an la hriat loh avangin finfiahna a la awm thei lo an ti a, motor pawh hi a brake a fail leh fail loh pawh an la hriat loh thu an sawi. Tunah hian case ziah luh tawh a ni a, mahse, report kimchang an la neih loh avangin sawi theih an neih loh thu an sawi bawk.

Dawrpui Vengthar-a lirthei chesual hian Taxi pakhat bakah bike leh scooty pahnih a hnawl a, Khumtung tlangval hi vanduai-ah tangin a nunna a chan phah ta a ni. K. Zorinsanga hi unau panga zinga naupang ber niin Beautician a ni a, a thih ni thleng hian Chawnpui-ah mi In luahin a khawsa a ni.