Trinamool Congress hruaitu, Mahua Moitra chu Ethics Committee-in 'zawhna zawt tura pawisa la'-a tia an puh hnuah Lok Sabha member a nihna atangin paih a ni ta.

Kum 49 mi, Moitra-i hi parliament rorel inkhawmah Narendra Modi-a sorkar hnena zawhna a zawhte chu zawt turin thamna a la thin niin puh a ni a. Sum a laksak zingah hian sumdawng, Darshan Hiranandani-a pawh telin Rs. Vaibelchhe 2 leh thil hlu dang a la niin an sawi.

Moitra-i hian parliament website-a account bik neih chu mi a pe kual nia sawi a ni bawk a, hei hi Hiranandani-a'n amah ngeiin zawhna a zawh theih nana tih niin an sawi a.

Modi-a sorkar bei nasa tak thin, Moitra-i hian thamna laa an puhna chu a pha a, parliament website-a in log-in-na kimchang erawh a pe tih a pha lo.

A chungchang hi nasa taka sawiho a nih hnu leh voice vote lak a nih hnuah Speaker Om Birla chuan, "He rorelna in hian committee thutlukna, MP Mahua Moitra-in dik lova a thil tih chu a pawm a. MP a nih zel hi a remchang tawh lo a ni," a ti.

Parliament-a sawiho a nih hma lawk hian Ethics Committee hian an report hi an thehlut a, phek 500 dawna chhah niin rorelna inah hian rorel lai, BJP leh eptute an inhnial nasa hle a, Moitra-i party pawh a tang na zingah an tel.

Sawiho zuina tawi tê-ah Congress leh Trinamool MP-te chuan zirchianna hun tam zawk awm te, Moitra-i tawngna hun pek ni se tih te an aupui.

Speaker Birla hian a phalsak lo thung a, kum 2005 pawh khan BJP MP paruk telin, MP 10 chu tuna thil ang chiah hian hnawl an lo ni tawh tih a sawi a. Hetih laia speaker, Somnath Chatterjee chuan report thehluh hnuah MP-te hi rorelna in chhungah an tawng thei tawh lo niin a sawi.

Moitra-i chhuina report-ah hian 'dan lova thil tih a pawm tih chiang taka langin phat rual a ni lo' tia tar lan a nih bakah 'sumdawng hnen atangin log-in (detail) a pek chhawn avangin thil pek a dawng ve thung a... MP nih loh phahna leh ttih dan phung lo tak a ni' tiin ziah lan a ni bawk.

Hemi chungchangah hian Moitra-i hian thamna sum a la ngei nia ngaih a ni a, report hian sorkarin 'dan bawhchhiatna hi chhui ngei tur leh sum vir vel dan hai chhuah ngei' ni se tiin a tar lang bawk.

Ethics Committee-in hma lak dan tur a rawtah hian, "...Pi Mahua Moitra, MP, hi Seventeenth Lok Sabha member a nihna hi paih theih a ni" tiin an ziak.

Zirtawpni tukah khan Moitra-i hi parliament-ah a kal a, thu thar lakhawmtuten an lo tihdinnah, "Maa Durga a lo kal ang! Kan hmu dawn alawm, chhiatna a lo thlen chuan hriat fiahna a thi hmasa thin," a ti.

Trinamool boss, Bengal chief minister ni bawk, Mamata Banerjee-i chuan roreltute a sawi nasat em avangin BJP-in Moitra-i hi paih theihna tur an ruahman niin a sawi a. "... mahse, he thil hian inthlanah a pui ang," tiin a sawi.

India-ah hian 2024 Lok Sabha inthlanpui hi thla tlem chauhvin a dang tawh a ni.