Aizawl: Rajya Sabha MP K.Vanlalvena chuan Mizoramah ramhmul damdawi siamna small industry din turin sawrkar laipui a ngen.

Rajya Sabha MP K. Vanlalvena hian Zirtawpni tlai khan Union Secretary of Ayush Vaidya Rajesh Kotecha chu a office chamber-ah a hmu a, Parliament House-a a lo sawi tawh, Mizorama ramhmul damdawi siamna tur Medicinal plant chungchang leh chumi kaihhnawih thilte a sawipui. MP hian ramhmul damdawi siamna small industry Mizorama din turin a ngen a, hemi chungchangah hian Union Secretary hian project thehlut turin thurawn a lo pek bakah an project te a lo approve sak tur thu MP hi a hrilh.

Hei bakah hian Mizoramah medicinal plant chi hrang hrang awm sa te chin punna turin pilot project kalpui turin a ngen a. Hei pawh hi project submit tur leh a lo approve tur thu a sawi a. Khum 50 theuh awm theihna Ayush Hospital pakhat theuh Aizawl, Champhai leh Hnahthialah te din sak turin MP hian a ngen a, Ayush Secretary chuan tihhlawhtlin a lo tiam bawk a. MP in Institution of Research and Training in Ayurveda and Homeopathy Mizorama din tura a ngenna chu Health Minister Dr. R Lalthangliana nen an lo sawi dun tur thu leh Mizoramin hmun hma a neih that leh that loh te endik turin amah a lokal tur thu a sawi bawk.

Ayush Minister Shripad Yesso Naik chu Covid 19 a positive avanga Goa-ah quarantine mek a nih avangin K.Vanlalvena hian Secretary hi a hmu ta zawk a ni.