Aizawl April 13, 2024 : MNF party chuan, “Thla li chuang hlek enchhin tawhah ZPM sawrkar kalphung a lang chiang tawh a, MP inthlana vote zui zel hi mipuiin kan ba tawh lo a ni,” an ti.

Nimin chhun khan Aizawl Press Club-ah chanchinbumite kawmin MNF Publicity Board Vice Chairman J.Malsawmzuala Vanchhawng chuan he thu hi sawiin, “Kan hma lawka Lok Sabha MP inthlan lo awm turah hian ZPM hian ‘kan ram, kan hnam leh kan sakhua’ himna tura thawh hlawk tur lam aiin sum haichhuah dan thiam an dap zawk niin a lang a. Dec. 8, 2023-a chief minister-in ni 100 chhunga an hmalakna tur a puan zinga inrenchem an tum thu a sawi pawh an hmalak dan enin inrenchem lam an hawi zui ta miah lo a ni,” a ti.

ZPM sawrkarah Chief Minister office chu thiltithei takah dah a ni tih sawiin, “Budget-a hmathar lakna tur tar lan, capital outlay Rs. vbc. 1,953.75 atangin CM chan, finance-ah vbc. 1,219.70 dah a ni a, hei hi 62% aia tam a ni a. CM kutah engkim a awm ta vek tihna a ni,” a ti bawk.

Sum enkawl chungchangah chief minister hual veltute enkawlna atana sum sen a tam hle tih sawiin MLA leh an duhsak zawngte hmanga sawrkar hmasa aiin sum an seng nasa hle niin a sawi a. “ZPM hian MNF sawrkar laia khawvel pum huapa harsatna nasa tak thleng avanga sum harsatna sawrkarin a tawh kha hrethiam duh lovin, ‘sum enkawl thiam lo leh puk reng renga khawsa’ tiin, nasa takin sawrkar hmasa an bei a. Chung harsatnate chu sukiang thei turin an inzuar a, an sawrkar tan tirh a tanga tun thlenga Open Market Borrowing (OMB) atangin vaibelchhe tam tak an puk a. OMB nasa taka an sawisel thin laiin 2024-25 budget-ah chuan OMB atanga puk turin Rs. vbc 1,170 an ruahman nghal a ni,” a ti bawk a. “Lok Sabha inthlanna neih turah hian mahni inhaivurna lama thiamna nei tha takte ni lovin, “Kan ram kan hnam leh kan sakhua’ himna tura huaisen taka ding zel tur K.Vanlalvena min vote-pui vek turin Zoram mipuite MNF chuan kan ngen a ni,” a ti bawk.