Aizawl May 5, 2023 : Mizoram Rajya Sabha MP K.Vanlalvena chuan vawiin chhun khan Union Home Minister Amit Shah a hnenah leh Union Home Secretary Ajay Kumar Bhalla IAS hnenah Manipura buaina thleng mek ching fel tura ngenna a thlen a, North East state hrang hrang-ah he buaina hi a kangkai thei tih Rajya Sabha K.Vanlalvena chuan a tarlang.

K.Vanlalvena chuan Manipur-a Mizo hnahthlak ten kum tamtak atanga vawiin ni thlenga an luah ram chu Manipur sawrkarin Forest Reserved atana a puan thar avanga heng buaina hi thleng a nih thu Home minister hnenah hian a thlen a. Manipur sawrkar hmalakna hi Central sawrkarin a tih tawp thuai a tul thu leh tihtawp a nih loh chuan North East state hrang hrangah he buaina hi a kangkai thei tih Rajya Sabha K.Vanlalvena chuan a tarlang bawk a.

K. Vanlalvena chuan, "Mizoram chhung-ah state dang atanga lehkhazir leh hnathawka awm mek te Manipuri (Meitei) te tiamin thlamuang taka an chen theih laiin Mizo hnahthlak hnam te chu Manipur state chhungah thlaphang takin an awm mek. Heihi titawp turin Central sawrkar hi a rang thei ang bera inrawlh a tul a ni," a ti.