Aizawl April 9, 2024 : 18th Lok Sabha inthlanpui lo awm tura MNF MP candidate K.Vanlalvena leh amah tawiawmtu MNF Senior Vice President, Dr. R.Lalthangliana chuan vawiin khan Tlabung leh Chawngte fangin Street campaign an nei a, Mizoram MP lo ni tawh ten a ram vei chanve pawha an vei a rin loh thu a sawi.

K. Vanlalvena chuan sum leh pai, chhung leh khat, vua leh vang amah tanpui theitu mi tha a neih ve loh thu a sawi a. Pathian leh mipui khawngaihna dil tura rawn pen chhuak ve ringawt a nih thu a sawi.

MNF MP candidate chuan, "English leh Hindi thiam nal tak MP kan neih tawhte hian ka ram vei chanve pawhin an vei ka ring lo. Manipur Meitei unau te, Assam sawrkar leh Myanmar sipaite huat hlawh khawpin Zohnahthlak te thlavang ka hauh a. Delhi thlengin Assam Police-ten min umzui a, ka nunna atana hlauhawm khawpin beih ka tawk a, kan ram tan chuan thih pawh ka hlau lo. Meitei leh Myanmar sipaite nasa taka huat ka hlawh bawk. Ka thlavang hauhsakte hian min hnawl leh si chuan ka MP leh zelna turah ram tan auchhuah pawh zahthlak ka ti tawh khawpin ka ring. In vote hmangin in duhsakna hlu tak lantir ve turin ka ngen tak zet che u a ni," a ti bawk.

K. Vena chuan, "Covid vang laia MP tan tir ve chauh ka ni a. Kan zin ve pawhin kan haw velah kar khat chuang zet te min quarantine thin a, kum 3 leh thla 8 MP ka nih chhung khan Mizoram tan thil tha tam tak tih duhin development work-te pawh hai chhuah duh mah i la; MP ka nih chhung khan kan ram tan ka duh angin thil tha ka ti hman lo a, hrehawm pawh ka ti," tiin, Zo hnahthlak hnam hrang hrangte insuihkhawm chu a duh ber leh a tum lian berte zinga pawimawh ber anih thu a sawi bawk.