Aizawl: MPCC chuan MNF sawrkar chu BJP malsawmna an duh vanga Citizenship Amendment Bill (CAB) a dodal ngam lo ah an puh.

Nimina thuchhuah an siamah Mizoram Pradesh Congress Committee (MPCC) chuan MNF sawrkar chuan sum leh pai harsatna a tawh mek avanga Central a an thawhpui BJP sawrkar malsawmna a mamawh em avangin Mizoram leh Mizo hnam tana chimralna kawng thlen theitu tur dan hlauhawm Citizenship Amendment Bill a dodal ngam lo a. CAB dodalna lantir tuma NGO Co-ordination hmalakna an hmehmih bakah dodalna lantir an awm loh nan dan khauh tak hmangin Aizawl khawpui chhung hmun tam takah Cr.PC 144 a puang niin an sawi.

CAB chu MPCC chuan a tir te atangin an dodal nghal tih sawiin an President Lal Thanhawla Chief Minister a nih lai pawh khan Union Minister of Law & Justice, Ravi Shankar Prasad leh Joint Committee on CAB Chairperson, Dr.Satyapal Singh te hnenah CAB dodalna lehkha na takin a lo thawn tawh tih sawiin NGO-ten chawpchilh taka an thu suta CAB dodalna an lantir thei lo chu pawi an tih thu an sawi a. CAB dodalna lantir tumte laka MNF sawrkar chet dan chu mak an tih hle tih sawiin ‘Mizoram tana dan sakei CAB dodal tum tak tak loah MPCC chuan MNF sawrkar hi kan ngai a. CAB hi a taka kaltlangpui a nih a, Mizote himna tura ruahmanna a awm lo a nih ngat chuan MNF Party hi Mizote himna tiderthawngtu leh mawhphurtu, hnam phatsantu diktakah kan ngai dawn a ni,’ an ti bawk.