June 13, 2022; Mizoram Pradesh Congress Committee (MPCC) chuan, chief minister Zoramthanga chu, dawt chiang taka congress party puh hmingchhia ah puhin, June 2022 ral hma a ngaihdam dil turin an phut a, ngaihdam a dil duh lo a nih chuan a tul dan ang zelin hma an la dawn tih an hriattir.

MPCC in vawiin a 'Ngaihdam dil tura phutna' CM hnena an pekah, June ni 10, 2022 a Vanapa Hall a Federation of Samagra Employess khawmpui a hmanpuina ah, thu dik lo a sawi thu tarlangin,"Mizoram State Health Care Scheme (MSHCS) atan congress party in kum 10 sawrkarna an chan chhungin cheng khat mah an dah lo...kan awm loh chhungin cheng khat mah dah belh a ni lo," tiin.

He thu hi June ni 11, 2022 chhuak chanchinbu hrang hrangah hmuh theih a nih thu te, dawt chiang taka congress party tihmualpho tumna leh mipui bum tumnaah an ngaih thu te MPCC chuan an tarlang.

April ni 5, 2022 a finance department in RTI zawhna an chhanna ah Mizoram State Health Care Scheme corpus fund chu congress sawrkar lai, kum 2010 atanga dah tan a ni tih chiang taka alan thu te, March 30, 2010 khan bank hrang hrangah cheng vbc. 117.80 dah a nih thu pawh chiang taka tarlan a nih thu an tarlang bawk.

"Samagra hnathawk mi sang chuangte hma a thu belhchian dawl lo i sawi avang leh, dawt chiang taka congress party i puh hmingchhiat avang hian, June, 2022 ral hma a ngaihdam dil ngei turin kan phut che a. Ngaihdam i dil duh lo a nih chuan a tul dan ang zelin hma kan la dawn a ni tih kan hriattir bawk che a ni," tiin CM hnena ngaihdam dil tura phutna lehkha an thehluh ah chuan an an tarlang a ni.