Aizawl: Congress party chuan MNF sawrkar inrelbawlna fel lo lutuk avangin Covid-19 vei an pung chak nia sawiin MNF sawrkar lai kher khera hripui a leng chu a pawi zual niin an sawi.

Nimina thuchhuah an siamah MPCC chuan MNF sawrkar lai, kum 2006 chho velah Mizoramah Mautam rapthlak tak a thleng a, mautam do nana ruahman vbc. 125 chu awmze nei miah lovin MNF sawrkar khan a hmang zo vek a, nasa takin an lo mualphopui bawk. Tunah MNF sawrkar lai bawkin COVID-19 hripui a lo leng leh ta a, hun rei tak, thla 6 dawn lai mipuite inhrek chunga kan inven laiin thuneihna an chan duh luatah fimkhur ngaih vanglai takin Village Council leh Local Council inthlan an buatsaih lui a. Rin lawk ang ngeiin COVID-19 chu a darh ta hluai mai niin an sawi.

MPCC thuchhuah chuan COVID-19 hripuiin thla 6 dawnlai min chenchilh chhungin RT-PCR dah theihna tur BSL-3 Laboratory pakhat pawh MNF sawrkarin an sual chhuak thei lo a. Falkawn Referral Hospital kianga Researcher pakhatin BSL-3 Laboratory atana a sak lai hawh chawpin, RT-PCR khawl pawh mi thilphalte lei chawp leh hawh chawp hmangin thla 6 dawnlai kan khawsa tawh a. COVID-19 dona kawngah thutlukna mumal lo, darkar 24 pawh a ral hma a sut leh ngai vawi tam tak siam a ni tawh a, thuneihna atchilh a inthlan an buatsaih luih tlat avangin community spread a thlen phah ta hial a ni, an ti a. Lockdown kalpui a ngaih leh tak avangin mi tam tak ei zawnnain a tuar nasa leh dawn hle a, eizawnna lama harsatna tawkte dawmkanna kawngah awmze neia hmalak nise MPCC chuan a duh niin an sawi bawk.