Aizawl: MPCC Media department chuan MNF sawrkar chu sum leh pai enkawlna kawnga hlawhchham leh talbuai mek ah an puh.

Nimina thuchhuah an siamah MPCC Media department chuan MNF sawrkarah sum leh pai harsatna a thleng mek a, sawrkar hnathawk Group A leh B-te hlawh an pe thei lo a, bill tam tak treasury-ah a tang mek a, sawrkar hnathawk pension pawisa pawh la thei lo tam tak an awm bawk nia sawiin hengte hian sum leh pai enkawlna kawnga MNF sawrkar hlawhchham zia a tarlang chiang hle a ni, an ti. Congress thuchhuah chuan India ram economy tlakhniam dan te, COVID-19 avanga kan buai dante thlirin, Mizoram hian sum leh pai harsatna nasa tak a tawk thei reng a ni tih hi hun engemaw chen atang khan Congress Party chuan a lo hmu lawk tawh.

Chuvang chuan COVID-19 hluar laia sawrkar sum leh pai chet vel dan pawh nasa takin kan lo sawisel tawh thin a ni, tiin dinhmun chhe taka ding thei reng kan nih avangin ei leh bar khawih thil ni lem lo, sports, entertainment leh an party worker te tana hnathawh tur hmanhmawh thlak loh tam tak contract an pek te chu chawlhsan rih a hun tawh thu Congress Party chuan a lo sawi tawh thin a ni, an ti a. Mahse, MNF sawrkarin opposition party-te leh mithiamte thurawn a ngaithla duh lo nia sawiin Congress sawrkar liamta-in a budget siam sa atanga vaibelchhe tam tak a hnutchhiahte chu ruahmanna fel nei lovin an hmang ral a, an budget siam an hman atang chiahin an buai ta a ni, an ti bawk a. Mipui thawhkhawm CM Relief Fund hmanga sawrkar bungrua tur vaibelchhe tam tak man an lei laiin, an party worker, an duhsak zawngte hnenah contract nuai tam tak man an pe reng a. Sawrkar hnathawk hlawh an batsak lai te, Group A leh B-te hlawh an pek theih loh lai pawh hian MNF worker-te chuan hnathawh tur an nei reng niin an sawi.

MPCC thuchhuah chuan CSS hnuaia thawkte hlawh chungchangah harsatna awm thin mah se, sawrkar hnathawk nghet hlawh pe thei lo khawpin Mizoram sawrkar hi a la awm ngai lo niin an sawi a. MNF sawrkar kan hrawn mek hi Mizoramin sawrkar a neih tawh a sawrkar chhe ber a ni an ti bawk.