Aizawl: Mizoram People Forum, Board of Executive Committee chuan ni 14.08.2020, 2:30 PM khan CYMA Committee Room-ah Village Council leh Local Council inthlan chungchangah meeting hmanhmawh a nei a, MPF leh political party-ten an lo ziah tawh, house to house campaign chu tihdanglam ngai lo an ti a, hetih rual hian hripui leng avangin VC/LC huam chhunga MPF Local Forum, political party leh LTF te inlungrualin house to house campaign chu an lo siam rem an remti thung.

MPF-in press statement a siama tar lan a nih danin August 27, 2020-a VC/LC inthlan neih turah MPF leh political party-te Thawhhona Thuthlung No 2. (2) a ‘Election puan a nih hnuah house to house campaign hi candidate-te tan phal a ni ang a. Amaherawhchu, sum leh therhlo nena len ni lo se. Party worker-ten candidate-te tel loa house to house campaign neih loh nise’ tih chu a ngaiin kalpui nise tha a ti a. Chutihrualin, hripui (Covid-19) len lai a nih avangin house to house campaign chungchang bikah Village Council/ Local Council huam chhunga MPF Local Forum, political party/ candidate leh local task force inrawnin an huam chhung dinhmun hre chungin a tul anga an lo siam rem MPF chuan a rem tih thu ziah lan a ni.

VC/LC inthlan niah MPF General Headquarter/District Forum/Constituency Forum etc anga polling booth tlawh kual thin chu hripui leng avangin neih lo nise tih a ni bawk a. Local Forum-te pawhin inthlan ni a MPF duty inruat chung-changah kum lama naupang deuhte inruat nise tiin thuchhuahah chuan tarl an a ni bawk. VC/LC inthlan chungchangah District Election Officer ngenna angin MPF Local Forum lam tan voter-te hming leh contact number ziah luh buaipui tur a ni ang a, vote thlak turte E-roll-a an serial number-te lo enpuia a tul anga slip lo buaipui pawh an kutah a awm dawn niin thuchhuah chuan a tar lang a ni.

Political party-ten campaign-na hun ni 25.08.2020, 5 PM thleng neiin DEO ngenna angin hemi chhung hian party leh candidate-ten Model Code of Conduct an bawhchhiat lohna tur leh mawihnai taka campaign an neih theih nana a tul anga hma lo la turin MPF Local Forum-te chu beisei an nih thu thuchhuahah tar lan a ni bawk a ni.

Covid 19 laka inven nan voter te'n mask an vuah em? tih lo endika, vuah lohte vuah tura hmalak te, voter te'n social distancing an zawm theih nan feet 6 tala inthlata awm tir tura hriattirna lo enzui turte leh BLO te nena inbe rawna Polling Officials (RO, PRO, security personnel) te tana eitur a tul anga lo buaipui te chu MPF Local Forum hmalakna turte a ni a. Heng bakah hian a tul dangah pawh DEO ngenna angin Local Forum chuan hma a la thei bawk niin thuchhuah chuan a tarlang.

Meeting hi Rev K Lalrinmawia, Vice President, MPF chuan a kaihruai a ni.