Aizawl January 27, 2023: Mizoram People Forum (MPF) Gen. Hqrs President atana thlan thar Mizoram Synod Moderator Rev Dr C. Chawnghmingliana chuan vawiin khan Rev Dr Vanlalnghaka hnen atangin mawhphurhna a la. 

Mawhphurhna hlan inkhawm hi Synod Committee Room-ah neih niin President kalchhuak ra Rev Dr. Vanlalnghaka Ralte chuan a kaihruai a,  Rev. Lalramliana Pachuau, General Secretary in tunhnaia MPF hmalakna te a tarlang bawk

President thar Rev Dr. C. Chawnghmingliana chuan, “MPF hruaituten inthlanna thianghlim a awm theihna tur leh sawrkar tha kan neih theihna tura hma an lo lak tawhna lawmawm a tih thu leh a ngaihhlut thu a sawi. MPF hmalaknaah hian inpumkhatna leh thawhhona tha a pawimawh thu a sawi a, kohhran te, tlawmngai pawl te inlungrual leh inpumkhat taka kan thawh chuan kan ramin hma a sawn zel ang.

Rev Dr. C. Chawnghmingliana chuan, "MPF chu Politic a tan lam nei lo, a lai taka kal tur kan ni a. MPF a tel pawl leh member ten tan lam neia kan kal hlauh chuan kan tum ram kan hlen thei dawn lova. A lai taka kal thei zel turin kan inbuatsaih a ngai a ni, a ti. 

President tharin mawhphurhna a lak rual hian MPF Gen. Hqrs Secretary, Prof. Malsawmliana pawh a term ( kum 3) a zawh tawh avangin term thar atan Secretary ah ruat thar leh a ni bawk. Prof. Malsawmliana hi Central YMA Asst. Secretary nilai a ni.