Aizawl: Mizoram Peoples Forum (MPF) chuan kohhran thenkhat an zinga tel remchang hrih lote chu tel ve tura sawm an tum.

Zalen-in MPF General Secretary Rev. R.Lalnuntluanga hnen atanga thu a dawn danin MPF-ah hian Mizoram chhunga kohhran thenkhat chu an la tel remchang ve lo a, heng mite hi tunhma lam chuan tawngkain MPF-a tel turin an lo sawm tawh thin a. Mahse, tunah chuan lehkha ngeia sawm a, an sawmte pawhin lehkha ngeia an hrilh let an beisei tih a sawi.

MPF General Secretary chuan tun hnaia sawrkarin district a puan thar, Khawzawl leh Saitualah district forum din an tum tih a sawi a. Ruahman dan chuan August ni 10, 2020 hian Khawzawl district forum hawn a, a tuk August ni 11, 2020-ah Saitual district forum hawn leh an tum niin a sawi a. Hnahthialah chuan behchhan tur an neih loh avangin district forum hi hawn a remchang hrih lo niin a sawi bawk.

Tun hnaia MPF thuneitu sang thukhawm chuan kan hma lawka Local Council leh Village Council inthlan lo awm turah inthlanna felfai leh thianghlim a awm theih nan theihtawp chhuah leh nise an ti a, hemi atan hian awareness pawh kalpui nise an ti a. Hun remchang hmasa berah chanchinbumite nen inkawmhona neih a, khawpui chhunga Pastor-te pawh inthlanna felfai leh thianghlim a awm theih nan kawm nise an ti bawk.