April 10, 2024; Mizo Zirlai Pawl (MZP) in tunkar chhung ngei a MPSC chairman bang turin an phut.

Vawiin a thuthar thehdarhtute an kawmna ah he thu hi sawiin, MZP president Lalthianghlima chuan, MPSC hian an thil tih dik lo sawi mam tum leh evaluator te tihsualah puh reng loin, an mawhah la se an duh tih a sawi a, MPSC zahawmna humhim a nih zel theih nan te, zirlai hna zawng mek ten an rinna an nghah zel theih nan MPSC chairman chu tunkar chhung ngeia bang tura ngenin, an ngenna in awmzia a neih loh chuan, chairman ban a nih ngei theih nan a tul angin hma an la zel dawn tih a sawi.

MZP chuan MPSC in february ni 1, 2024 a result a tihchhuah tak combined competitive examinations kalpui danah thil fel tawklo leh chhuichian ngai thil a awm ngei tih sawi bawkin, mains exam paper thenkhatah correcting fluid te hman niin, mark pek tawhsa thaichhiatna leh mark tihdanglamna hnuhma thahnem tak a awm thu te, hmun hnih khat mai ni lo, hmun tam takah a awm thu te a sawi.

"MPSC hian heng answer paper te hi tunhma zawng a RTI Act hmanga dilchhuah an remtih thin laiin, kuminah chuan an remti ta lo thut a, a hnuah certified copy pe chhuak lovin, inspection without photograph an phal leh a, nawrna avangin a hnuah phone a thlalak an phal leh chauh a ni. An thil tih dik tawk lo avangin, hlauh an neih vang a ni em, tih zawhna a awm phah hial a ni," a ti bawk.