Aizawl January 5, 2023: Congress Thalai chuan December 31, 2022 zanlaia khap a ni chunga halpuah leh halmawi nasa taka hal a ni chu thupek kenkawh kawnga sawrkar chak loh vangah an puh a, Mizoram Tourism departmnent official page lama halmawi leh halpuah thla thehdarh a nih chu an hriatthiam loh thu an thuchhuah siamah an tarlang.

Mizoram Pradesh Youth Congress Committee chuan Mizoram mipuiten Krismas leh Kumthar lawmna tluang taka kan hmang thei chu lawmawm an tih thu leh Mizoram mipuite Kumthar 2023 chibai bukin duhsakna an hlan a, Sawrkar tha kan neih theih nan tun atanga ngaihtuahna seng turin mipuite an ngen bawk a ni.

MPYCC chuan Mizoram sawrkarin Halpuah leh halmawi hal a khap chunga Kumthar 2023 lawmna December ni 31, 2022 zanlaia Aizawl leh khawpui thenkhatah nasa taka hal a ni chu dan leh thupek kenkawh kawngah Mizoram sawrkar a fail zia lanna pakhat niin an hria a. A hming chauh thupek chhuah tawh lovin, thupek kenkawh kawngah tan la turin Mizoram sawrkar, a bikin Home Minister chu an chah. 

Halpuah hal khapna thupek chhuah a nih lai hian Halpuah leh halmawi thlalak tam tak chu Mizoram Tourism Department official page hrang hrang - facebook, twitter etc hmangin thehdarh a ni leh lawi si kha MPYCC chuan mak an tih thu an sawi a, Mizoram sawrkar chu kaldan mumal nei lo a puhin, a thenin an khap a, a thenin an lo thehdarh kha Home Minister thupek chhuah Tourism Minister-in engahmah a ngaih lohzia leh MNF party chhungkaw buai zia lannaah an puh bawk.

Congress Thalai chuan, "Mizoram inthlanpui kan hmachhawn leh dawn tawh a, sawrkar tha leh rintlak, eiru lo leh sum enkawl thiam sawrkar a din ngei ngei theih nan, Mizoram mipuiten mi hmingtha leh enchhin chawp ve ngai lo MPCC President Lalsawta chungah rinna nghat a, Mizoramah Sorkar Tha a lo pian theih ngei nan lo thlawp theuh turin Zoram mipuite kan sawm a ni," an ti.