DOWNLOAD OUR APP

Read latest news on your phone
app-store

MPYCC-in MNYF President thusawi chhang

Jan 24, 2023

Congress Thalai chuan Thawhtanni-a Mizo Hnam Run Chhung inkhawma MNYF President Dr. L. Thangmawia, MLA thusawi an chhang a, "MNF hi Pathianin Mizote tana min pek a ni," a tih chu Mizotam mipui zahlohna leh pawisak lohna lian taka an ngai tih thuchhuah an siamah an tarlang.

Aizawl January 24, 2023: Congress Thalai chuan Thawhtanni-a Mizo Hnam Run Chhung inkhawma MNYF President Dr. L. Thangmawia, MLA thusawi an chhang a, "MNF hi Pathianin Mizote tana min pek a ni," a tih chu Mizotam mipui zahlohna leh pawisak lohna lian taka an ngai tih thuchhuah an siamah an tarlang. 

MPYCC chuan, "MNYF President L. Thangmawia'n Party thenkhat chu a dintute la damlai ngei pawhin hmuh leh hriat tur awm lovin an boral a, MNF erawh chu ralthuam leh sipai chakna hmanga nek ral an tum pawhin Pathianin min chawisang zel tih a sawi hian Mizoram mipui rilru a tina takzet a ni," an ti. 

Congress Thalai chuan, "MNF an lan apiangin Mizoramah buaina leh manganna nasa tak a thleng ziah a. Mizoram mipuite dinhmun a derthawng a, mipui an rum thin. MNF sawrkar hi Mizoram National Front inti chunga hnam dang uchuak taka duhsak thintu, Mizoram mipuite chanai laksaktu a ni. Inthlana an intiamna, SEDP hmanga mipui bumtu an ni tih hi kan ngaihdan nghet tak a ni. Tun hnaia Zalênna sual laia MNF Vice President Lalnunmawia Diary bu thum - Zalenna Chauh, East Pakistan-ah leh 1971 tih tlangzarh chuan Mizoram mipui ngaihven a hlawh a, a thu inziak te hian MNF party chet dan a hailang a, a chhiartu mipuite rilru a ti na thar hle a ni," an ti bawk. 

MPYCC chuan, "Congress Party hi Mizoram mipuite tana ding a ni a, mipuite tana a tiamte party thliar lovin New Land Use Policy (NLUP) hmanga tanpui an ni a. Mi tam takin eizawnna an neih phah a, AMC inthlan hnuhnung bera MNF Councillor (Corporator)-a an dintir thenkhat te pawh NLUP dawnga eizawnna din thei an ni. Oposition bialah pawh NLUP tanpuina hmanga eizawnna nei ta MNF mi leh sa thahnem tak khaw tin, veng tin leh mual tinah a taka hmuh tur an awm. MNYF President hian hei hi a duh chuan englai pawhin a en theih turin kan kawl reng a ni. MNF sawrkarah chuan Minister tam tak Chief Minister laka tlatlum ve lo ten kal ngaihna an hre lo a, mahni inhaivur tuma Chief Minister tlawn thiam apiang an tlatlum a, Minister thenkhat phei chu 'Mr. 25%' tih hiala koh te an ni," an ti. 

Share now