Aizawl June 19, 2022 : Mizo National Front party chuan Mizoram State Health Care Society a bill ba a tam chhan chu MNF sawrkar hnuaiah damlo ten natna zawng zawng an bill theih bakah beneficiary 1,00,000 chuang an tlin tawh vang a ni, an ti.

Nimina thuchhuah an siamah MNF chuan tun dinhmunah Mizoram State Health Care Society chuan bill pek chhuah theih loh Rs vbc 55 vel a nei mek tih sawiin thla khat bill ringawt pawh Rs vbc 6-7 a ni tawh a. Hetih lai hian Finance Dept. GoM-in Corpus Fund peipunna pung atangin quarter khat (thla 3 dan) zela bill a pekchhuah thin chu Rs vbc 4 vel a ni a. Congress sawrkarah kha chuan natna khirh bik chauh a bill theih avangin bill a lut tam lova, beneficiary pawh 30,000–40,000 inkar chauh an ni a, Corpus Fund pung atangin bill a cover phak a ni, an ti.

MNF thuchhuah chuan Congress sawrkarah khan MNF sawrkar hmasa ruahman sa Corpus Fund-a dah bak State sorkar sum atangin cheng khat mah an dah belh lo nia sawiin, dah belh ve anga an insawi fo hi Corpus Fund awmsa (a pung nen) leh AB-PMJAY (CSS) pawisa chauh an hmang a ni, an ti bawk.

Tunhnaiah ADB loan Rs vbc 1004.70 lak tur chungchangah loan puk tur Rs vbc 803.76 chu External Aided Project (EAP) hnuaia kal tur a ni a, EAP guidelines angin Central sorkarin 90% - Rs vbc 723.38 atangin a rul ang a. Loan puktu Mizoram Sorkarin 10% - Rs vbc 80.38 atangin a rul dawn tih sawiin Mizoram sawrkarin ADB Loan a puk tur zat chu Rs vbc 80.3 chauh nia sawiin a pawh 1.5% – 2.5% vel chauh niin an sawi bawk.