Nizan khan Mizoram Super League Play in Game-1 match 3-na chu Khatla TBl leh Mission Veng Hotshots ten khelin 105-74 in Khatla TBL an chak a, final an lut. 

Kumin MSL-ah hian semi-final khel tawp lovin an la hman ngaih loh dan thar Play in dan hman a ni a, entu mipui lamah Play in dan hrethiam tawk lo an tam hle niin a hriat. Then khatin a fair dan ber tia an sawi laiin a, mi tamzawk erawh chuan a dan a kikawi bakah table-a a sang pahnih te chance tha bik lutuk chu a thalo tiin an sawisel ve thung a, semi-final game hnih khelha final lut tur zawn a fuh ber ring an awm bawk.

Play In game 2-naa Zarkawt BCA laka tlawm tawh Khatla TBL chuan final-ah phuba lakna hun tha an nei leh dawn. MSL final game 1-na hi July ni 12, thawhlehni zan khian  R. Dengthuama Indoor Stadium, Mualpuiah an khel dawn a, n loh phal chi a ni lovang.  
Inkhelh tan atangin Khatla TBL an khel tha nghal a, Play in khelhah BCA an hneh tawh loh vangin chak ngei an tum tih a hriat a, quarter hmasa berah hian 24-18 in hnehna an chang nghal bawk. Quarter hnihna tan a ni a, Hotshots lam an hot hleithei tlat lo. TBL lamin an khel tha tulh tulh thung a, 31-20 zetin chakna an chang leh. Chawlhlawk an hman meuh chuan TBL lamin point 17 zetin hma an hruai hman der. 

Quarter thumna khelh tan a ni a, Khatla TBL lamin tha an thlah duh lo, Hothots lam an insiamtha hlei thei lo bawk a, 28-21 zetin TBL lamin an la leh. Quarter linaah pawh 22-15 in TBL lam hian an hneh leh a ni. Team inhnehtawk tak tura ngaih inkhelah hian TBL hian an khel tha hle a, quarter zawng zawng an la a, Hotshots lam erawhin zan dang an phak lo deuh niin a hriat thung.  

Khatla TBL tan Vanlalthazuala chuan point 31 thawk chhuakin an foreign player Levi Bradley Jr chuan point 30 a score ve bawk. Mission Veng Hotshots tan an foreign player Joshua Aaron Keyes chuan point 30 a thun a, Zonunsanga'n point 17 a thawk chhuak ve bawk.

Total Period 1 Period 2 Period 3 Period 4
Khatla TBL :           105-24-31 28-22
Mission Veng Hotshots : 74-18-20-21-15