Aizawl: School Education Minister Lalchhandama Ralte chuan Middle School Leaving Certificate siam thar leh tum a ni tih a sawi.

Nimina Ratu Higher Secondary School Building sak thar a hawnnaah he thu hi sawiin Minister chuan, “Zirna quality siam that nan hun reilo teah Middle School Leaving Certificate Examination siam thar leh tum a ni a, school inspection pawh mumal zawka kalpui anih theih nan ruahmanna siam a ni,” a ti bawk.

Minister chuan khawtlangah zirnain hmun sang a channa hmunah chuan zirna quality a tha thin a ti a. Kan ram zirna hmun leh compound te chu khawtlang hruaitute leh nu leh paten vil ngunpui a, tuaihnum a pawimawh thu a sawi a, zirna chu sawrkar kutah ringawt dah chi a nih loh thu leh mipui nen tanrual a tul thu a sawi bawk.

School Education Director James Lalrinchhana pawhin hripui leng mek vangin pawl I-XII zir tan SCERT leh MBSE ten Week wise plan an siam tih sawiin hengte hi school hawn theih hunah assessment atan hman a nih dawn avangin nu leh pate pawh an fate lo ngaihvenpui turin a sawm a ni.

School building thar hawn tak hi Rs 28,05,869/- senna niin office, class room 2 a ni.