February 1, 2023; MZP hruaitute leh Aizawla College leh hnam bil zirlai hruaitute ruahmanna siam angin, January thla chhunga Mizoram Subordinate Services Selection Board (MSSSB) Chairman ban tura sawrkar an ngenna a hlawhtlinloh avangin vawiin atangin MSSSB Chairman Lalrammawia pisa kai tur zirlaiten an dang a, sawrkar atanga thu lawmawm an la hmu lo a nih chuan February ni 2-ah MSSSB Chairman pisa kai tur dan chhunzawma, an la hlawhtlin loh fo chuan February ni 3-ah kawngzawh an tum.

MZP chuan tunhnaia MSSSB hna lak ah hnamdang 3 lak an ni tih tarlangin, a mawhphurtu ah MSSSB chairman an ngai a, a kaihhruaina hnuaia MSSSB hna lak awm zel tur chu ram leilung fate tan him tawk lo ah an ngai tih an tarlang.

Sawrkar hnaruak grade pay Rs 4200 (UDC chunglam) hi Mizoram Public Service Commission (MPSC) in a la/conduct a. Hna lak hi hlawm lian chihnih in a then theih a. Chu chu Gazetted chin/officer leh non-gazetted (employee) a ni.

Gazetted ah hian chi hnih : Group A leh Group B, Group A ah Mizoram Civil Service, Mizoram Police Service, Mizoram Information Service etc. te awmin, Group B gazetted ah a langsar zual State Tax Officer, Employment Officer, Supply Inspector etc te an ni.

Tun dinhmun a MSSSB in a khawih chin chu Group B non-gazetted niin, a langsar zual thenkhat chu, UDC, Sub-Inspector, Zirtirtu, Nurse etc te an ni.

Mizoram sawrkar chuan MSSSB chairman atan February ni 24, 2020 khan Lalrammawia a ruat a. Lalrammawia hi Mizoram Secretariat Service (MSS) atanga pension tawh a ni a, DP&AR in hriattirna a tih chhuaha tarlan a nih danin MSSSB chairman hna hi kum 65 a tlin hma emaw kum 3 chhung emaw a thawk dawn a ni.