ZALEN March 8, 2025 : Vawiin Inrinni chawhma khan Mizo Students’ Union (MSU) hruaitute chuan, Dr. Vanlalthlana Higher & Technical Education Minister chu a chenna inah an hmu a, RUSA hnuaia zirtirtu lak thar te chungchang an sawi.

MSU hruaitute chuan Minister hnenah hian, kum 2019 a RUSA hnuaia Asst. Professor direct recruitment MPSC kaltlanga Zirtirtu 70 lak te chungchang an thlen a. Heng College zirtirtu lak te hi kum 2 hnua Mizoram sawrkarin a chhawr chhunzawm tura lak an ni a. Sawrkar hnuaia an ngheh thuai theihna turin MSU hruaitute chuan Minister hi hmalakpui turin an ngen a ni.

Dr. Vanlalthlana H&TE Minister chuan MSU hmalakna chu awm a tihpui a. RUSA hnuai atanga Asst. Professor lak te hi, an ngheh ngei theihna turin Sawrkar lam pawn hma an lak mek thu a lo hrilh a ni.

MSU chuan RUSA hnuaia Asst.Professor thawk mekte regularised an nih theihna tura hma an laknaah lawmthu an sawi a. Heng zirtirtu te chungchanga hmalakna hi MSU chuan a ngaihven zui zel dawn a ni.