Aizawl December 7, 2022: Mizo Students' Union (MSU) chuan Bangladesh atanga Zohnathawk Mizoram-a rawn luh tum mi 90 te chu BSF ten kut an thlak avanga leh an eitur la neih ang te an tihchingpen sak avangin Bangladesh lama an kir leh an ti a, BSF ten ramhnuaia an let tir leh hi MSU chuan na an tih thu leh BSF duty te a dem takzet tih thuchhuah an siamah an tarlang.

MSU General Headquarters, Aizawl hian vawiin December 7, 2022 khan Parva 3-ah Bangladesh raltlan, ni eng emawzat eitur mumal ei tawh lo mi 15 te chu an Vice President Laldinsanga hovin Parva -3 khawtlang mipuite leh Tuichawng Group YMA, Damdep 2 khawtlang hruaitute nen an lo dawng sawng a ni. Raltlan lo lut thar te hi ramhnuaiah ni eng emaw zat chaw nghei an nih avangin an taksa a chau hle a, an hriselna dinhmun enfiah nghal a ni. MSU chuan thu an dawn danin heng mite ruala rawn kal mi 90 bawr vel erawh BSF duty ten kutthlakin, an ei leh in neih chhun te an tih chingpensak avangin ei tur an hmuhna tur ngaihtuahin Bangladesh lam an pan leh ta tih an sawi. An letna lamah pitar pakhat chu a boral tih MSU chuan an sawi bawk.

MSU chuan raltlan lo luh thu hi Parva 3-a sawrkar official awm te an hriattir nghal a, sawrkar kutah an him chhunzawm zel tawh an beisei, tih an thuchhuah siamah hian an tarlang. Bangladesh buai avanga Zohnahthlak unaute ram hnuaia chaw nghei leh thlabar taka awm mek hi mi 800 chuang an la awm mek tih an sawi a, himna zawnga Mizoram rawn pan Zohnahthlak lo raltlan mekte hi Mizoram an luh ngei theihna kawnga harsatna awm zawng zawng sukiang thuai turin Mizoram sawrkar an ngen nawn bawk a ni.

Tunah hian Parva 3-ah raltlan awm zat hi 310 an awm mek a, Mizoram Sawrkar chuan raltlan lo lut te himna leh riltama an awm loh nan theihtawp a chhuah mek zel avangin MSU chuan lawmawm an tih an thuchhuah siamah hian an tarlang a, Chin National Organisation (CNO) chuan Bangladesh unau raltlante tan tanpuina sum fai thahnem tak MSU kutah an hlan tih an tih an sawi.

MSU Gen. Headquarters Vice President, Laldinsanga chuan, "Bangladesh-a kan unau Zohnahthlak awm mek te hi Bangladesh Army, Rapid Action ten an nun nek chepin thil lei leh hralh phalsak an ni ve lo a, an hmeichhia te an khawihin mipa te an man a, Bangladesh sipai laka himna beiseiin Zofate In Pui, Mizoram chu an himna turin an lo pan ta a ni," a ti. "Bangladesh-a kan unau Zohnahthlak awm mek te hi Bangladesh sawrkarin tun hma atanga an nek chep avangin mi rethei te te an ni a, ngaihsaktu leh hmangaihtu an mamawh a, thlamuang taka an lo luh theih nan leh ngaihsak zual turin Mizoram mipui ka sawm a,  Bangladesh kan unau raltlan te tan MSU chuan theihtawp a chhuah zel dawn a, engtik hunah pawh Zohnahthlak te tan MSU chu a inhawng reng dawn a ni," a ti bawk.