ZALEN September 12, 2023 : Vawiin khan Mizo Students’ Union: General Headquarters, Aizawl-in USA atanga Project - Mizoram Second Container (Medical equipment & supplies, manna pack) USA atanga chah luh chu Mizoram chhunga raltlan awmna hmun hrang hranga thawn chhuah turin Chin National Organisation (CNO) hnena hlanna leh semchhuahna neih a ni a, MSU General Secretary hlui Lalremruata Chhangte chuan Vanapa Hall kawt atangin a vai liam.

Project–Mizoram hi Mizoramin COVID-19 avanga harsatna tawhte chhawmdawlna atana a chah luh a ni a. Project–Mizoram 2023 second container-ah hian damdawi lam bungrua chi hrang hrang bakah manna pack (food package) a awm a, a thawh khatna hi nikum 2022 khan Mizorama Community Health Center (CHC) leh Primary Healthcare Center (PHC) hrang hrangah sem darh a lo ni tawh a ni. Tun Project - Mizoram a thawh hnihna hi ‘Humanitarian Aids’ tia vuahin Burma, Bangladesh, Manipur-a chengte an ram buaina avanga Mizoram rawn belte’n an mamawh ang zelin camp hrang hrangah a tul anga sem darh tur a ni.