ZALEN July 10, 2024; Mizoram Taxi Association, (MTA) General Headquarters, Aizawl chuan Mizoram khua leh tui nihna neilo local taxi lei leh khalh, tun hnai te atang khan an pung thar nia sawiin pawi an ti hle a, hei hian local taxi khalh a eizawng mek te leh mipuite-ah harsatna nasa tak a siam tih an tarlang.

MTA chuan Mizoram Khua leh tui nihna nei lo local taxi lei leh khalh mek te hian taxi fare hrechiang lovin an duh ang zat zat fare sang tak tak an chhiar ṭhin ni a hriat a nih thute, taxi a passenger te bungraw theihnghilh, zawn chhuah ngaihna hriat loh tam tak a awm phah bawk a, hei hian local taxi driver te a ti hmingchhe chho mek tih an tarlang.

Mizoram Taxi Association, General Headquarters, Aizawl chuan Mizoram khua leh tui nihna nei lova taxi Lei leh khalh mek te chu July 2024 ral hma ngei a taxi te tiral tur leh khalh mek te pawhin an hna bansan turin a ngen a. He ngenna pawisa lova taxi lei emaw khalh lui te chu an chungah eng pawh thleng se Mizoram Taxi Association chuan mawh a phur lovang tih an tarlang.

Mizoram Taxi Association member zawng zawng te pawh an thuchhuah pawisa lova ti lui an hriatte chu a rang thei ang bera General Headquarters hruaitu te emaw taxi stand hrang hranga hruaitute hnenah hriattir turin an chah bawk.