ZALEN February 10, 2025 : Lunglei Dist Congress Committee (LDCC) chuan Village Council leh Local Council inthlan Campaign kharna hun an hmang a, he hun hmanpuitu MPCC President Lal Thanzara chuan, "MTKP inkhawmpui nena insubuai thei khera Sawrkarin V.C leh L.C inthlan a buatsaih hi thil mak tak a ni a, kan chhim lam Minister leh MLA te hian awka an nei ve lo em ni," tiin zawhna a siam.

Lal Thanzara MPCC Mizoram Baptist Kohhran Thalai Pawl (MTKP) inkhawmpui lian February ni 13 atanga tan tur a awm tih hre reng chunga kan sawrkarin inthlanpui hun atan February ni 12 a ruat tlat mai hi a mak hle a, inkhawmpui leh inthlanpui ni a inang chuang lo pawh ti mah se, he inthlanpui hian TKP member leh hruaitu tam tak a nghawng buai ngei ang tih a hriat sa a inkhawmpui kal chak ve tak tak mi tam tak chuan MTKP inkhawmpui hi inthlanna lama an buai vangin an chhim ve thei dawn lo tih a chiang a ni," a ti.

"Hetiang hun khera inthlan buatsaih lo tur hian kan chhim lam Minister leh MLA te hian awka an nei ve lo a mi. MNF leh Congress te an lo sawrkar tawh thin a, an sawrkar laiin mipuiin an bawh luai luai thin laia tuna kan sawrkarin kumkhat emaw chauh an tlin laia an chhuahsan luai luai thung hi thil mak tak a ni. Tuna kan sawrkar chuan mipui ah thil tha tam tak thlai thar lei, hmunphiah lei leh thil dangte an tiam a, a takin engmah an tih leh theih siloh avangin mi beidawng tam tak an siam mek," a ti bawk.

MPCC President chuan, "Congress Party chuan NLUP Cheng Nuai khat dawng tawh chhungkaw Nuaikhat leh singli 4 te bakah SEDP Cheng nuai 3 dawng leh ta silo te pawh huam vekin mirethei khaichhuah nan Cheng Nuai 2 kan hmang dawn a, kan sem dawn lo a, miretheite kan khaichhuak dawn a ni," a ti.

Central BJP sawrkarna hnuaiah Kristian Missionary te an chep zela langsar takin Missionary ang pawh a an awm ngam tawhloh laia BJP thawhpuitu MNF leh ZPM Party a awm hi Mizo Kristiante tan hian a inhmeh em tih ngaihtuah a ngai Lal Thanzara hian a ti bawk.

Congress President chuan, "Kum 30 chhungin Congress in engmah tih an neilo titute an han sawrkara Congress sawrkar hnathawh tam zia chu a hrechiang bertu an ni zel a, an sawrkar hnua an tih langsar ber chu Congress Sawrkar kutchhuak Medical College leh Airport mai bakah Hydel Project hralh tum a ni," a ti bawk.