ZALEN September 19, 2023 : Thla nga dawn hnuah pawh Mualpui Zero point leh Silaimual inkar, Saikhamakawn khaw hnuai zawna mimal In hmun laih min, khawih chhunzawm leh si loh chuan lirthei tlan vel a tibuai a, helai kawng zawh thin te tan harsatna a siam nasa hle.

Lei laih chim zui ta hian kawngpui a chim thui hle a, a chimna tawp leh tawp hi a inhmuh phak loh avang leh lirthei a inpelh theih loh avangin intawh changin a buaithlak hle a, thui tak tak back a ngai thin a, ruah a surin a diak em em thin bawk a, ke pahnih nei tan phei chuan kal harsa khawp te a ni thin a ni.

He lai leimin chungchang hi PWD hotute lamah pawh an thlen fo tawh niin thu dawn a ni a, mahse, tun thlengin ngaihven a la hlawh lo a, he kawng zawng tute leh a bul hnai te chuan thenfai hna hi thawh thuai ni se an duh hle.