ZALEN April 16, 2026: MPCC Spokesperson Dr. Lallianchhunga chuan ZPM sawrkar hian mipui tam zawk hi MUHCS-a inziak lut tura a duh tak tak chuan mipui nawlpui ban phakin Enrollment Fee a ti hniam mai tura an ngaih thu a sawi, ZPM Minister te pawh MUCHS-a inziaklut ve turin a ngen.

MUHCS hi a hmang tangkai tawhtu damlo te hmaizah avangin Congress party chuan a pawng a takin sawisel a hreh a. MUHCS enkawltu Official ten theihtawp an chhuah lai a ZPM sawrkar hotu lian te hian a nihna bak baka an fak thin erawh tha an ti lo a. Chuvangin, MUHCS hi uluk takin an zir chian thu a sawi.

Dr. Lallianchhunga chuan, "MUHCS a inziah luhna man hi a tam tham avangin sawrkar atanga hlawh la lo, mipui nawlpui tam zawkin an chhawr pha loah kan ngai a ni. Congress hunlai khan Mizoram State Health Care Scheme (MSHCS) a inziak lut kha chhungkaw nuai khat chuang te an ni thin a, tunah erawh mipui nawlpui (Contributory Beneficiary) MUHCS a inziak lut an tlem ta hle," a ti. 

"2026 hian ZPM sawrkarin tan han la thar viau mah se, Enrollment Fee a to em avangin April 14 thleng khan mi 29,472 an inziak lut tawh a, a hma kum aiin mi 9000 chuangin an tam tawh zawk a. Heti chung hian sawrkar kal tawh te hunlaia inziahluh tlem ber lai pawh an la pha chuang lo a ni."

"Congress hunlai khan mipuite ban phakin, enrollment fee pawh sang lo takin Health Care Scheme an kalpui avangin chhungkaw nuai chuang inziak lut an awm thin a. MNF sawrkar khan enrollment fee a rawn tihsan hret hret hnuah kum 2022-2023 chhunga inziak lut kha nasa takin a tla hniam ta a; a hma kum (2021 Oct -2022 March) a inziak lut zat 87,695 chu 2022-2023 ah chuan 39,505-ah a tla hniam a ni. Hei hian Health Care Scheme a Enrollment Fee tihsan hi mipuiin an zo lo tih a lantir," an ti bawk.

Congress spokesperson chuan, "MUHCS a inziah luhna man a tam em avangin Kohhran hrang hrang te an member te tanpui tura an pen chhuah a ngai ta hi ZPM sawrkar tan a zahthlak zawk hle ah kan ngai a. ZPM sawrkar hian mipui tam zawk hi inziak lut tura a duh tak tak chuan mipui nawlpui ban phakin Enrollment Fee a ti hniam mai tur niin kan ngai a. Mizoram sawrkar atanga hlawh la ve lo chhungkua zawng zawngin MUHCS hi chhawr thei se tih hi kan duh ber a ni," a ti.

"MUHCS hi a tha hle nia ZPM Minister ten an ngai takzet a nih chuan MUHCS hi zawm ve nghal se la. MUHCS a inziak lut tam takin Empanelled Hospital a khum an chan loh avanga MUHCS la zawm thei lo Pvt Hospital a sum tam tak senga an inenkawl a ngaih laia ZPM Minister leh MLA dang ten an duh duh Hospital a an damlo inenkawlna senso zawng zawng an Bill thei hi hriatthiam a harsa hle. Tawngkam thiam taka MUHCS hi fak ringawt loin, a taka hma hruai turin ZPM Minister te kan beisei a; hnathawh kawr ha tura kan beisei laiin Mizo thuam manto tak taka inchei ringawtah duh tawk mai lo turin kan ngen a ni," a ti bawk.