ZALEN June 25, 2025; Mizoram Pradesh Congress Committee Treasurer, Dr. Lalmalsawma Nghaka'n ZPM sawrkarin kawng bo takin Mizoram Universal Health Care Scheme (MUHCS) kalpui a tum tih sawiin, hei hian administration an hriat loh zia leh an thiam loh zia a lantir niin a sawi.

Vawiin a thuthar thehdarhtute a kawmna-ah he thu hi sawiin, MPCC treasurer chuan, MUHCS ah tun thlengin mi 5,000 vel chauh an la in register te hi mipui lam pawhin rinhlelhna an la nei lian hle tih a lang tih a sawi. "Sawrkar damdawiin lian ZMC leh civil hospital-ah khum chan a har bawk si a, emergency tak taka inzai ngai te, nau vei te an awm a, private hospital an pan loh theih loh hun a lo awm a, buaina a thleng chho mek a ni. Heng thil lo thlen chhan hi sawrkar ruahmanna fel loh vang leh kalphung hriat loh vang a ni a, hei hi kalphung thar a nih chuan mipuiin an tuar nasa dawn a, an hriselna phei chuan a tuar hle dawn a ni," a ti bawk.

He scheme mumal lo taka kalpui a tum hi ZPM sawrkar hian ngaihtuah tha leh se, private hospital te nen inremna neihpui thuai thuai se, hlawhtling takin kal se tih chu MPCC duh dan a nih thu a sawi.

MPCC treasurer thusawi thenkhat :

= Sawrkar hnathawkte hlawh an cut luih sak anga lang te hi thil serious tak a ni. Sawrkar hnathawkte hian dan hnuaiah an hlawh ah thu an nei a, chu chu an right a ni.

= He scheme a mipuite thawh ve tur sum hi a tam hle a, chhungkaw thenkhat tan chuan a hautak hle dawn.

= Mipui tawrhna a nasa tawh si a, sawrkarin MUCHS hi mipuiten private hospital hrang hrangah hman theih turin chingfel thuai rawh se.

= Mizorama private hospital te hmelma en ti tiha an en laia phai lam hospital te duhsak zawk anga an che te hi sawrkar hian mipui tawrhna lo thleng thei thil hi engahmah a ngai lo a ang hle.