Aizawl: Mumbai Mizoram House a damlo leh anmahni enkawltu zing-ah Covid-19 vei mi 3 hmuhbelh an ni a, positive hmuhchhuah tharte hi mipa 2 leh hmeichhe 1 niin cancer vei 2 leh anmahni awmpuitu 1 an ni.

Health Minister Dr. R.Lalthangliana ngenna angin damlo hmuhchhuah thar 3 te chu COVID-19 enkawlna damdawi in Seven Hills Hospital-ah dah tawh niin tun dinhmunah insawi-selna leh harsat na an nei lo a, a symptom pawh a lang lo a ni.

Mumbai Mizoram House-a thleng zawng zawng zinga sample la test loh pawh a rang thei ang berin test an ni ang tiin DIPR thuchhuah chuan a tarlang a ni.

April ni 13 khan TATA Memorial Hospital-a inenkawl mek Mizo damlo chu COVID-19 a vei tih hmuhchhuah a nih avangin Mizoram House dormitory-a awmte leh Cancer vei midangte nasopharyngeal swab sample 20 test lak a ni a. Sample test result hi nimin khan hriat niin mi 3 dangin an vei tih an hmuchhuak a ni.