Aizawl: Mizoram State Museum in January ni 20-24,2020 chhunga Museum Week an hman chu Zirtawpni khan khar a ni a, week hman chhung hian mi 16469 in Museum hi an tlawh.

Museum Week hmang tur hian Aizawl khawpui chhunga zirna in 11 te chu sawm an nih bakah mi thahnem takin an tlawh a. January ni 20 ah mi 1174, ni 21 ah 3134, ni 22 ah 3028, ni 23 ah 3719 leh ni 24 ah 5414 tlawhtu an awm a ni. Week chhunga Museum tlawhtu zat chawhrualin nitin mi 3293.8 in an tlawh anga ngaih a ni.

Mizoram State Museum hian 2018-2019 sawrkar kum chhung khan tlawhtu mi 13157 an nei a, museum en man atangin sawrkarah Rs. 41430.00 an chhunglut a, museum tlawh tu zinga mi 33 te hi Foreigner an ni a, mi 14 te hi VIP leh VVIP an ni bawk. Mizoram State Museum-ah hian Gallery 6 a awm a, Mizoram State Museum hian Museum objects 2679 lai a la khawm tawh a, heng zinga 729 te hi show case chi hrang hrang 109-ah pho chhuah a ni a. A bak zawng hi reserve collection-ah dah a ni. Tribal Museum, Ranchi-ah te, Bhopal Museum-ah te, Silpigram Museum, Guwahati- ah te, Jawaharlal Nehru Museum, Itanagar-ah te Mizo hnam hmel lanna Museum Objects eng emaw zat thawn (Donate) a ni tawh.

Mizoram State Museum hi March - September thla inkar chhung zawng chu dar 10:00 AM - 4:00 PM -ah hawn thin a ni a, October - February chhung chu dar 10:00 AM - 3:30 PM-ah hawn a ni thung.