Internet khawvelah kan cheng a, hmasawn a thang chak hle. Thiamna a sang tulh tulh a, mihringte theihna pawh tihdanglamin a awm mek zel. Hetiang karah hian music industry sawi nghing dawrh thei tur nia sawi a awm leh ta a, chu chu Artificial Intelligence (AI) software pakhat Boomy hi a ni. 

Music industry-a insawhngheh tum tan chuan Alex Mitchell-a kutchhuak Boomy hi zirchian a, hriat bel chhoh a ngai dawn a nih hmel hle. Alex Mitchell hi he website leh app hmuchhuaktu hi a ni a, a thil hmuh chhuah hian music industry a sawi nghing dawrh thei dawn niin mithiamte chuan an sawi tlat mai. 

A hmangtute chuan artificial intelligence (AI) software hmangin an mahniin hla an record thei dawn. Genre hrang hrang thlan tur a awm a, i thlan zawh hnu chuan 'create song' tih chu i hmet tawh mai dawn a ni. AI chuan second 30 velah i duh thusam chu a rawn tichhuak tawh mai dawn a ni! 

Boomy hi kum 2018 khan California-ah bultan a ni a, tunah hian a hmangtute chuan hla maktaduai 5 vel zet chu an tichhuak tawh nia tarlan a ni. Boomy thatna em em chu an website leh app hmangtute hla record sa chu Spotify-ah mipui ngaihthlak theih turin an chhawpchhuah sak thin a, miin an lo ngaihthlak khan a hla neitute khan hlawh an lo nei ve ta zel a ni. Spotify bakah hian music streaming site thenkhatah pawh a tih theih bawk. Hetih lai hian Boomy hian an mahni kaltlanga hla record reng reng hi copyright an chang vek thung. 

Mitchell chuan, "Boomy hmangtu 85% zet hian tun hmain hla an lo la record ngai lo a, a hmangtu tam berte hi mithar a ni," tiin a sawi. 

David Guetta ngaihdan
French DJ lar David Guetta chuan music industry hma lam hun chu AI software-ah hian a la innghat dawn tih a sawi a, amah ngei pawh a hmangtu zingah hian a tel. Rimawi lama tawn hriat ngah tawh a ni a, a thusawi hi awih sak loh ngawt chi a ni lo - hmang mektu zingah a tel tlat. Kum 55 mi David Guetta hian Eminem tihdan entawnin, live show atan hla lyrics leh rap te chu AI software hmang hian a lo siam tawh a ni. 

David Guetta ngaihdanah chuan musician te hian AI hi an la hmang chho nasa dawn chauh a, music style tharte hi he thiamna hmanga lohchuak thar zel hi niin a sawi bawk.