Aizawl : September 1, 2022 atanga Mizoram sawrkarin, MV ( Amendment) Act, 2019 kenkawh a tum avanga mipuiin Pollution test chungchanga buaina a tawh chungchangah ZPM chuan thuchhuah siamin, pollution test-na hmun tur a awm leh si lo chu pawisa chawitir tum vanga hrim hrim a ni em tiin, sawrkar an zawt.

Thuchhuah an siamah ZPM chuan, Aizawl leh Lunglei khawpui lovah district khawpui dangah pollution test-na tur a awm lo a, dan zawm duh mipuite'n harsatna an tawk nasa hle a, sawrkâr hian he dan kenkawh a tumna kawngah hian mipuite hian dan zawm se a tih vâng nge mipuite chetsual châng a, pawisa chawi tir a tum vâng tih hi ZPM Thalai zawhna a ni, an ti.
 
ZPM chuan, "Pollution test hi khawng taka kalpui a nih dawn chuan sawrkâr motor hlui tawh tak tak, khu chhuah nasa tak tak te'n pollution test an paltlang dan sawifiah ngei turin Mizoram sawrkar kan ngen a ni. He'ng pollution tehna khawlte hi rim taka hman a ni avangin a 'reading' hi a rintlak em tih hriatna turin an khawl calibration hi engtika tih nge a nih leh calibration certificate a awm ngei em? tih kan sawrkar hi kan zawt a ni," an ti. 

Aizawl-a pollution test-na tur hmun mipui dawl zo a awm lo, dan zawm tura inbuatsaih mipuite'n harsatna nasa tak an tawk mek, ZPM chuan an ti. "Hetiang hi kan dinhmun a nih avângin, sawrkar hian SEDP sem tur tuakna atana mipuite man a, pawisa chawi tir hrim hrim a tum-te a nih ngawt loh chuan, district capital-ah pollution test-na khawl a awmkim hma leh Aizawl khawpui ngeiah pawh mipui dawl zo khawp pollution test-na khawl a awm hma chuan MV (Amendment) Act 2019 hi kengkawh rih lo turin Mizoram sawrkâr kan ngen," an ti.