Aizawl : Lockdown tum sarih neih chhung khan sawrkar phalna ni lovin Myanmar atangin mi 200 chuan an rawn lut hman a, heng ho te hi Village level task force te chuan an dawngsawng thin a, quarantine pawh an paltlang vek a ni a, Champhai district lama Ningani-a an hmuchhuah pawh kha Myanmar atanga rawn lut zinga mi a ni.

Champhai lam atanga ZALEN thudawnna in a sawi danin, Tahan lam nena an inbiakna atangin Myanmar lama tangkhang mi 200 an awm tih an rawn hrilh a, heng ho hi a hnuah sawrkar hriatpuina tel lem lovin anni hi an lo dawngsawng ta thin a, hemi hma pawh hian mi 13 chu an lo dawngsawng tawh bawk a ni. Heng an lo dawnsawn te hi Mizoram mi leh sa vek an nih thu a sawi bawk. Tuna positive pawh hi quarantine centre-ah la enkawl mek niin, a hriselna lam pawh a that thu a sawi a, a rawn haw pui te zingah erawh positive an hmu lo.

Tuna Covid-19 an hmuchhuah te hi mi 20 vel a huhova rawn haw niin a sawi a, a tir chuan anni hian Zokhawthar gate rawn paltlang an tum a, mahse, kaltlang an phal loh avangin Tiau lui vela kai theihna tur an dap a, Mizoram rawn luhna mai tur an hmuh loh avangin lui kam velah hian riah te pawh an riak a, nunau te an nih piah lamah an bawr hle niin thudawnna hian a sawi. Hetianga an khawsak reng hi ni theia an hriat loh avangin sawrkar thuneitu lam pawh rawn lem lovin Mizoram an luh tir ta mai a, anni ho hi quarantine centre-ah dah luh nghal an ni. Myanmar lam atanga rawn haw te hi Champhai mi leh sa mai ni lovin Mizoram hmun hrang hrang a mi te an nih thu a sawi bawk.