Aizawl: India leh Myanmar inrinaa awm Group YMA hrang hrang te chuan ramri ven hna chu la thawh chhunzawm a, a tul anga duty zel an tum.

Vanapa group YMA Treasurer leh Hnahlan Joint YMA Assistant Secretary ni bawk Lalremruata Cherput chuan thil awmdan a zirin kumin chhung pawh an duty a ngai mai thei niin Zalen a hrilh a. “Myanmar rama Covid-19 hri vei an hmuhna khua kha kan ral lawk a ni a. Myanmar ramah hian inkharkhip pawh awm lovin an la zi nuai nuai reng mai si a, he hri hi a lo lut palh ang tih kan hlau hle a. A lo luh loh nan Hnahlan khua phei chuan hmun 5-ah duty post kan nei a, duty tur pawh May thla chhunga mi chu kan ruat fel vek tawh a ni,” a ti.

Tuipuiral group YMA President H.Lalrinliana chuan an group huam chhunga khaw 10 - Khuangthing, Thekpui, Thekte, Farkawn, Chawngtui, Vaphai, Vangchhia, Lianpui, Leisenzo leh Sesih te chu Myanmar ramri anih avangin fimkhur a ngai hle tih a sawi.

“Kan group huam chhungah hian Myanmar kalpawhna khan a tam hle a, khaw hrang hrangte hi an duty hah tawh hle a. Chuvangin karleh chho hi chuan ramri a awm ve chiah lo khaw 11-ten a remchan dan angin duty chhawk kan tum a ni,” a ti.

H.Lalrinliana chuan boruak a ralmuan hma chu duty kalpui zel an tum tih sawiin MLA leh mi tlawmngai ten tanpuina an pek that avangin ei leh in pawh an hninghnar hle niin a sawi bawk.

Vanhnuailiana, group YMA President Thankunga pachuau pawhin duty chu kalpui zel an tum tih Zalen a hrilh a. An huam chhungah chuan Bulfekzawl, hruaikawn, New Hruaikawn, Melbuk leh Zokhawthar te chu an ven ngun zual niin an sawi a. Ramri-ah lut an awm la hriat loh thu sawiin luh ruk tum an mante chu an hnarkir niin a sawi bawk.

Tuichangral group YMA Secretary Lalsangliana chuan an group huam chhunga khaw 2, Sailulak leh Lungkawlh te chu Myanmar ramri an ni tiin anmahnia duty kalpui an la duh avangin an la pui lem lo niin a sawi a. Engtik hunah pawh anmahni pui turin an inkau reng niin a sawi bawk.

Champhai Sub.Hqrs. President VL Chama chuan an huam chhunga ramri duty te chu an hah tawh lutuk avangin mi tlawmngai (volunteer) lain duty chhawk den den an tum niin Zalen a hrilh.