January 10, 2023; Farkawn bul Tiau kam a Chin National Army (CNA) te camp, Camp Victoria vawiin a Myanmar sipai ten bomb hmanga an beih vangin Farkawn khaw motor chhia (darthlalang keh) a awm a, bomb them (suan kang) pawh Farkawn ramchhungah hmuh a ni.

Farkawn atanga ZALEN thudawn danin, Myanmar sipai ten Tiau kam a CNA camp bomb hmanga an beih hun hi vawiin chawhnu dar 3:33 ah niin, bomb vawi 5 a puak nia sawi a ni a, bomb puak nghawr vangin Farkawn a TC. Hmangaihsanga motor chu a hma darthlalang a keh vek a ni.

Farkawn khaw ramchhungah Myanmar sipaite bomb thlak siper, suan kang pawh hmuh ni bawkin, CNA te camp hi Farkawn khawchhun atanga km 8 bawr vel a hla, Tiau kam a awm a ni.

Vawiin a bomb puahna chhehvel ah hian a hma atangin jet fighter a rawn thlawk zeuh zeuh tawh, CNA lam hi an inthiar fihlim hman nia sawi a ni a, news thenkhatah chuan CNA mi leh sa 5 an thi nia tarlanna te pawh a awm.

Vawiin thil thleng vang hian Tiau kam chhehvel atangin mi engemawzah Farkawn lamah an raltlan a, a hmalam a lo awm sa te nen, tun dinhmunah Farkawn ah hian Myanmar ram buai vanga raltlan mi sang 1 bawr vel an awm mek nia thudawn a ni.