Inrinnia sipaiten Thantlang an kah hma, tun thla tir lamah khan United Nations chuan Myanmar ramah hian sipaite chet dan thlirin mihring dikna chanvo nasa taka palzut leh nunau tawrhna nasa tak a thleng thei tih a sawi lawk.

Myanmar-a UN Special Rapporteur Tom Andrews chuan thu a dawnah sipaite hian anmahni do lettute tamna, an ram hmar leh hmarthlang lam chu ralthuam tha tak tak nen an pan nasa a, na taka an chet a rinawm thu a lo sawi tawh.

Sipai sorkar hian nunau nasa taka sawisain indonaa a pawi chin khawiha thubuai neih theihna pawh an nei nual thei dawn niin a sawi lawk bawk.

Myanmar sipaite chuan an sorkar duh lotute bei let zelin laipuiin  khawthlang lam khaw pakhat an kap a, chenna in tam tak a chhia.

Chin State khawthlang lam, Thantlang-ah mipuiten an inhumhim nana sipai pawl an lo din ve nen an innawr hnuah laipui hian an kap zui ta niin Khit Thit leh The Chindwin chanchinbute chuan an tar lang.

Tar lan fo tawh angin Asia chhimchhak lam ram hi February thla atang khan an buai hle a. Sipaite hian mipui sorkar paih thlaa sipai sorkar an din duh lotute mi 1,200 chuang an thi tawh niin tual chhunga lo chhinchhiahtute chuan an sawi a. Self-defence force an tih, mipuiin sipai pawl an dinin tharumin nasa takin an bei let ve a, thisen pawh a luang nasa hle.

Thantlang-a cheng pakhat, a hmaa khua chhuahsana tlanchhe tawh chuan mipui sipaiten sipai an man hnuah laipui hian kah an ni tih AFP news agency a hrilh.

“A hnu lawkah laipuiin an kap ta chiam a ni,” a ti a, chenna in 80 atanga 100 vel a chhia niin a sawi.

“Inte hi laipui kah vanga kang nge sipaite hian an hal tih hriat a ni lo,” a ti.

Tual chhung chanchinbute chuan tlang hring tak karah khuaa in kang khu hluah hluah thlalak an tichhuak nasa hle.

Save the Children chuan in 100 vel kang chhia a awm tawh tih sawiin, laipuiin chawhma dar 11:00 vela a kah a\anga kang a nih thu an sawi.