Aizawl : Zirtawpni khan Mizoram Youth Commission (MYC) Chairman Dr.Vanlaltanpuia, Lunglei North bialtu MLA ni bawk chuan hun rei tak atanga Indian Armed Forces-in Pukpui, Lunglei hmun an luah man (land rent) bat chungchangah Ministry of Defence South Block, New Delhi-ah a dawr. 

Mizoram buai kum 1966 atanga India Sipaiin Pukpui ram an luah man ba, kum sawmpanga (15) chhung an pek tawh loh (overdues) avanga mipui manganna te chu bialtu MLA anih angin Ministry of Defence hotute hnenah a thlen a, thuneitu chuan engvanga  hun rei tak rent hi pe tawh lo nge an nih tih leh, eng harsatnate avanga pek loh nge a nih? tih te lo enfiah thuai an tum thuin MLA Dr.Vanlaltanpuia hi an lo chhang a ni. 

Defence Ministry lam hian, Mizoram state sawrkar nen lehkhaa an in dawr tawhna zawng zawngte lo enchhuah vek a, a theih anga chingfel tura hmalak an tum thu leh hun remchang hmasa bera thlir ho leh nise tha an tih thu an lo hrilh bawk.

MYC Chairman, Dr. Vallaltanpuia hi Ministry aiawhin Rakesh Mittal IDES, Joint Secretary Lands & Works, Eddie L. Khawlhring ICAS, Additional Financial Adviser & Joint Secretary leh Director Defence Estate-te'n Central Secretariat South Block New Delhi-ah an lo dawngsawng a ni.