Aizawl: I&PR Minister Lalruatkima chuan, “Mizoram Youth Commission hi thalaite hmathlir tipuitlingtu, lei rem an rah nana kawng tinrenga hma la thin tu an ni a, an hlutna mipuiin kan hriat a pawimawh a ni,” a ti.

Zirtawpni zan khan Mizoram Youth Commission buatsaihin Khuangchera Project- huaisen inzirtir hawnna programme chu HYVE Hall ah neih a ni a, he huna khuallian Information & Public Relations Minister chuan MYC moral reforms hmalakna peng pakhat Khuangchera Project- Huaisen inzirtir hawn a ni ta chu lawmawm a ti a, rah tha a chhuah ngei a beisei thu a sawi a. MYC chu thalaite hmathlir tipuitlingtu, lei rem an rah nana kawng tinrenga hma la thin tu an ni a, an hlutna mipuiin kan hriat a pawimawh, a ti. Minister Lalruatkima chuan COVID 19 hrileng mekah ramria cheng mi tlawmngai tam tak dai theua an hmalakna ropui a tih thu a sawi a, “Hetiang hun harsa a lo thlen hian Zohnahthlak tlang hrang hranga cheng te nena kan inunauna a lo parchhuak a, ei leh bar kan nghei hlau em emtu - Manipur, Tripura, Bangladesh leh Myanmar-a cheng kan unaute kan chawimawi che u a, kan theihnghilh ngai lo vang,” a ti bawk.

MYC Chairman Dr Vanlaltanpuia chuan Mizoram Youth Commmission-in ram leh khawtlangin rilru kan puthmang a tha zawnga kaihhruai an tum thu sawiin chuta hmalakna peng pakhat atan “Khuangchera Project: Huaisen Inzirtir” chu kalpui an nih thu a sawi a. Pasaltha hming hrang hrang chawiin project hrang hrang -Taitesena, Khuangchera, Vanapa, Chawngbawla leh a dangte kalpui an tum thu a sawi.

Serlui bialtu MLA Lalrinsanga Ralte chuan tun hnaia ramri buai chungchangah ramria cheng mipuite an huaisen a, an fakawm tak zet, a ti a. Chief Minister hmalakna a fakawm a, ram hruaitu lu ber a huaisen chuan official te leh mipuite an dawih thei lo tiin sawrkar tlawmngai pawl leh mipuite zai khata luangin tum thuhmun neia an tanrualna chuan rah tha a chhuah nia a hriat thu a sawi a ni.

He programme-ah hian Chairman, Joint Village Council, Vairengte; Phainuam VCP; Thinghlun VCP; Saihapui VCP; Laltinkaia, Vairengte; Phainuam Nuho (MHIP), Saihapui V Nuho leh Tv. Malsawmkima, Vairengte te hnenah tawlhloh puan, thuziak leh Rs. 10,000 theuh an hlan a. Central YMA, MZP leh MSU President ten thu sawina hun an hmang bawk.