ZALEN Aizawl 11, 2025: ZPM General Headquarters' chuan party chhung inkhawm vawiin khan Party Office-ah an nei a; Mizoram Youth Commission Chairman Malsawmzuala Ralte chuan thu sawiin, MYC-in Mizo thalaite tana hna a thawh dan leh tun hnaia Hulhliap Short Stay Centre chungchanga sawrkar hmalakna te a sawi fiah.

Malsawmzuala chuan, "Sawrkarin hna a lak tur Group A leh B exam coaching class kalpui mek a ni a, tunah hian zirlai 109 an awm mek a; fees hi thla 4 chhung atan Rs. 4000 niin Lunglei, Kolasib, Champhai leh Siaha-ah te coaching hi kalpui mek a ni. Sawrkar kum kal ta chhung khan MYC coaching class a kal thin thalai mi 33 chu sawrkarin hna a lakah an tling a ni," a ti. 

Kum 2024 atang khan Community Social Responsibilty (CSR) hmangin, Visan Foundation nen kil 3-in thawh ho a ni a; Hotel Management Food & Beverage training batch 5 zawh fel tawh niin, zirtirtu hlawh leh trainee uniform te hi HONDA-in an tum a ni. Sawrkar kum liam ta chhung khan Mizo thalai 114-in India ram hmun hrang hrang hotel changkangah hna hmuin an thawk mek a. Kuminah dilna hawn leh a ni a, tunah hian training lai 70 an awm mek bawk. Ruahman anga thil a kal tluan chuan, India ram Hotel thaho bakah foreign hotel liante pawhin an rawn interview dawn a ni. 

Kumin financial year chhung hian Hotel Management Training seat 200 kan nei a; tunah hian Lunglei leh Champhai Youth Centre-ah batch 1 ve ve training turin ruahmanna peih fel ni tawh bawk. India ram hmun hrang hranga Hotel nei The Lalit te nen thawh hona thuthlung ziah a ni a, Spa therapist training tur an la a, an hotel-a thawk zui nghal tur Mizo nula 15 nikum chhung khan MYC-in a tir chhuak tawh a ni. 

Kum 2024-ah khan Mizo thalai British Army-chawlh hmanga lo hawte nen thawh ho kan rel a, Mizo thalai 247 British Army-a tang turin dilpui an ni a, heng zing atang hian mi 5-in kohna dawngin, MYC-chuan loan dilpuiin, April thla khan England-ah kalin an tling fel tawh a ni. 

Governor kal chhuak tain min sawm angin, Sri City Special Economic Zone, Andhra Pradesh-ah ka zuk zin a, Company lian pui pui 200 chuang an lo awm khawm a, heng company zinga Daikin Air Conditioner siamtute nen indawr zuiin, Mizo thalai 8-in hna an thawk mek a ni. 

MYC hian a theih ang angin Corporate Social Responsibilty (CSR) a dap kual a, State Bank of India in Nuai 25 man Bus an pe tawh a, HONDA Company-in Rs 14,26,10- in a pui tawh a, Mizoram Rural Bank-in Computer 20 set, dawhkan leh chair set 20 ve ve a pe dawn bawk a ni. 

Malsawmzuala chuan, "MYC kal tlang hian Mizo thalai 170 zetin kum 2024-2025 chhungin hna an hmu tawh a, ram pawna hna thawkte hlawh hian Mizoram chhunga sum che vel pawh a nghawng pha a, kan sum lak luh tipungtu pakhat a ni”, a ti bawk.