Aizawl: MZP hruaitute chuan Zirtawp tlai khan an President B.Vanlaltana hovin Saihapui V an tlawh.

He hunah hian MZP President B.Vanlaltana chuan Assam lamin min nekna leh vauna karah sawrkar leh Police ho hmalakna lawmawm a tih thu a sawi a. “Assam hovin an duh hun hunah kawng an rawn dang a, an duh hun hunah an rawn tlangtir a, an tel lova awm thei loah hian min ngai hi a tlawm thlak tak zet a, kawng an rawn tlang tir lo a nih chuan Mizo mipuite zah-awmna humhim nan sawrkar hotute pawhin Assam sawrkar engti kawng pawha be lo turin kan duh a ni,” a ti. MZP President chuan, “Mizo nihna hrim hrimah pawh Vaiin hetia min vau ngam hi a tlawm thlak hle a, kan ram, Mizoram hi kan theih ang anga humhimin, vau zam mai mai theih kan nih lohzia kan lantir zel a ngai a ni,” a ti bawk.

MZP Adviser L. Ramdinliana Renthlei chuan, "Tuna kan buaina hi ramri issue a ni a. Sawrkar hian issue hi a man lo ang tih a hlauhawm khawp mai. Ramri buaina phenah Assam hovin kawngpui an dang a, kan sipaite an vau mai zawk a ni. Kan buaina tak tak zawk chu ramri a ni tih kan hriat tlat a ngai a ni. Mizoram sawrkar hian a ramri hi ti chiang sela, hemi hmang hian map siam rawh se, ramri a Mizoram mipui leh sawrkar ngei pawhin a pawm chin 1875 hmang hian map kan siam a, kan sawrkar pawh hian a hauh ngam a ngai a ni," a ti bawk.