Aizawl May 8, 2024 : MZP chuan MPSC Chairman chhuak ta, JC Ramthanga'n "MPSC Chairman chu bang tura nawr chi a ni lo" tih amah an thlahnaah a sawi a. MPSC-a thil thleng zawng zawngah hian mawh laa bang tur a nih laia, a bang ngam lo chu MZP chuan a hun kal tawh enin awm a tih thu thuchhuah an siamah an tarlang.

MZP chuan, "JC Ramthanga hi Addl. Chief Secretary a nih lai November, 2020 khan a makpa chu Covid chhuanlamin one time relaxation hmangin, Mizoram Engineering Service-ah thun tum tawh a ni a. MZP hmalakna avangin an ti tlang ta lo mai kha a ni. Tin, Chief Secretary nih a duh avangin, a mah aia senior zawk Chief Secretary ni theite nasa taka tibuai tawhtu a ni," an ti.

MZP chuan Zirlaite hmalakna avangin mi pawimawh tak taka ban an nih tawh tih tarlangin, "Minister, MLA leh mi pawimawh tak tak Mizoram-ah ngei pawh ban an lo ni tawh a. MZP hmalakna avangin, kum 1979 khan Tribal Quota titawp tura Parliament in hnihin a passed tawh pawh India President-in a lo hnawl phah tawh tih te hi JC Ramthanga hian hria se kan duh a ni. Mizoram Sawrkar hian hun lo la kal zel turah, eng dinhmun pawimawhah mah ruat nawn tawh lo se kan duh bawk," an ti.

MZP chuan Inquiry Officer pakhatin, thiam chantir mahse MPSC dik lohna chu a dik ta tihnaah a ngai lo a. MPSC dik tak a awm theih nan ngun takin an enzui zel dawn an ti bawk.