Aizawl: Mizo Zirlai Pawl (MZP) chuan Tripura sawrkarin Zampui tlanga Tuikuk te inbenbel tir a tum chu an duh lo tih sawiin a tawp thlenga do zel an tum tih an sawi.

Nimin khan MZP Pisa pui ah chanchinbumite kawmin MZP President B.Vanlaltana chuan, "Tuna Tripura-a Tuikuk awmhlen turte hi Mizorama awm duh lo, Mizote nena chenho duh lo te an ni a. Mizote nena chenho duh tawh lo Tuikuk-te Zampui tlanga Mizote nena chenho tir tuma hmalak a ni leh si hi MZP chuan a pawm thei lova. Zampui Tlang dunga Tuikuk khaw thar din a nih chuan chi leh chi inkarah innghirnghona tawp thei lo a thlen kan hlau a. Chuvangin, Tripura sawrkar pawhin a thil tum hi sutin Zampui tlangah Tuikuk khua din lo turin thinlung takin kan ngen a. Chu chu hun lokal zel tur atana Tripura ram ralmuan zelna tur atana thil pawimawh tak pawh niin kan hria a. Tuikuk, Mizorama awm duh lote nen hian Zampuia Zofate hi inhnaih taka an awm tlan hi hun lokal zel tur atan thil tha aiin thil tha lo a hringchhuak zawk dawnin MZP chuan a ngai a. Tuikuk tan pawh Zampui area-a an awm hi an hmalam hun atan a tha lo zawkin MZP chuan a ngai a ni," a ti.

MZP President chuan Sakhan tlang dunga Mizo khua 7 chu Tuikuk te avangin kan chan tawh tih sawiin, "Sakhan Serhmun, Sakhan Tualsen, Upper Dosda, Satnala, Sakhan Tlangsang, Bancherra leh Lungthirek te hi Mizote luah khua a ni thin a, Tuikuk-te hian an in leh lo chhuhsakin an lo umchhuak tawh a. Zofate luahchin ram hi Tuikuk-te avangin khap khat pawh chan leh MZP chuan kan remti tawh lo a ni," a ti bawk a. Kanchanpur Young Chakma Association ten thuchhuah siamin Tripura-a Tuikuk awm hlen turte an welcome thu an puang nia sawiin, "Chakma te hian Tuikuk inbengbel turte hi an welcome tak zet a nih chuan an chenna bialah khaw din tir mai turin kan rawn a ni," a ti bawk. Press mite zawhna chhangin Tripura sawrkar chuan Zampui tlang ah hian Tuikuk in 300 vel dah a tum niin an sawi.

MZP President chuan Zomuantlang-a Police out post chu tih changtlun nise, Phuldungsei ah Police dah ni bawk se an duh tih an sawi a. Hemi chungchang hi Chief Minister leh Home Minister ah pawh an thlen tawh tih sawiin duh aiin sawrkar a muang nia an hriat thu an sawi bawk.