Aizawl: Nimin dar 3 khan MZP hruaitute chuan Home Minister Lalchamliana chu a chenna inah an kawm a, Assam National Register of Citizen (NRC) final list a tihchhuah chung-changa Mizoram lo inven dan tur te, Tripura ICFAI University-a Mizo zirlaite harsatnate leh Mizoram-Assam ramri chungchang te an sawi-pui.

MZP chuan nimina Assam in National Register of Citizen (NRC) final list a tihchhuah avangin Mizoramah hnam dang thahnem tak an lo lut ngei dawnin a hria a, an lo tlan chhiat loh nana lo inven a ngaih thu te an sawi a. Home Minister hian Chief Secretary be nghalin, Mizoram leh Assam ramri police check post-ah tun aia uluk leh zual a duty tur leh a tul a nih chuan police dah belh a nih theih nan hma lo la turin a hrilh nghal a, ILP dil thar Assam atanga lo kal an awm pawhin Assam NRC nei lo chu ILP emaw, temporary permit emaw pawh pe chhuak tawh lo turin District tina ILP lam khawihtute lo hriattir turin a hrilh nghal a ni.

MZP chuan tun hnaia Tripura ICFAI University a Bengali leh Tribal zirlaite inkara buaina awm chungchang a Mizo zirlaite harsatna leh manganna chungchang leh Mizoram-Assam ramri chungchang te an sawipui bawk.