Aizawl : Nimin khan MZP General Headquarters executive meeting chuan Thinghlun khua, Mamit district-a Assam Police leh Assam Forest Department-in John Zolawma thlam an halsak chungchang an ngaihtuah a, meeting hian thlam hi MZP bultuma sak that ni se an ti a, an thlavang hauh turin MZP president B. Vanlaltana leh hruaitu eng emaw zat chuan Thinghlun hi an pan nghal niin ZALEN chuan thu a dawng.
\

MZP chuan John-a thlam haltu Assam Police leh Assam Forest Department chu a dem takzet tih an thuchhuahah chuan an tar lang a, Mizoram mipui, sawrkar leh Mizo thalaite hmuhsitna leh tham lohnaah an ngai a. “Thlam bakah huan thlai puitling tawh tam tak chhungkaw enkawlna tur tia an lo hahpui tawh chu kar lovah tihchhiatsak vek an ni hi MZP chuan a tawrhpui takzet a ni,” an ti.

John-a leh Ben David-a te thlam leh thlai tam tak hala suam a nih tawrhpui nan leh thlahual nan MZP hian Rs. 3,000 ve ve hlan nise tiin a rel a, thlam sak that hna hi ni October 12 atanga 17, 2020 inkar hian thawh an tum a, nimina kalte hian mamawh turte an lo zuk enfel dawn niin B. Vanlaltana chuan ZALEN a hrilh.

John-a leh Ben David-a te tanpui duh leh MZP hmalakna tur atana thawhlawm thawh duhte tan SBI Account No. 10763514287 IFSC- SBIN0001539-ah hian thawh theih a nih thu an sawi bawk.

MZP chuan Mizoram chhung ngeia a ram neitu zawkten kut an tuar fo chu hriatthiam har an tih thu an thuchhuah chuan an tar lang a, kumina hnam dang kut tuar Mizote hming pawh an thuchhuahah hian tar lang telin, Takam leh Tuikuk te kutah mi paliten kut an tawrh tawh thu leh, Zawknuam VLTF te venbuk tihchhiahsak a ni leh John Zolawma leh Ben David te thlam leh huan thlai tihchhiatsak an nih thu an tar lang bawk.

“A ram neitu zawk nek chep leh tuartu zawka kan tang reng hi MZP chuan pawi kan ti hle a. Mizoram Sorkar pawh na leh zuala hma la turin kan phut nawn leh a ni,” an ti.

MZP hmalakna tanpuina tur hian Rev.C. Rualchungnunga chuan pawisa fai a thawh nghal avangin MZP chuan lawmthu a sawi a, mi thahnemngaite penchhuak turin an ngen bawk.