ZALEN January 29, 2024 : Vawiin khan MSU General Headquarters Aizawl chuan Mizoram University chhunga Meitei Community te chet dan chungchanga lungawi lohna ziakin Mizoram University Registrar hnenah lehkha an theh lut a, a copy hi Dean Students’ Welfare leh MZUSC te hnenah an pe bawk.

MSU chuan, "Hun rei tak ata tawh Mizorama Hnam dang zirlai awmte himna turin theihtawp a lo chhuah tawh thin a, Manipur buaina avanga hlauhlawpa Meitei zirlaite an tlan chhiat lai pawhin a hnemtuah tangin kan unaute laka an chet duh dan avanga thinrim taka kan awm lai pawhin state ralmuang ber kan nihna chhawm nung turin kan insum hram hram thin a. Tun hnaiah MZU-a Meitei zirlaite’n kan unaute tih chimihna tur hmanraw lei nan a sum an lo khawn leh ralmuang taka kan dah laia hnung lam atanga min vit let hi MSU chuan a ngai thiam lo tak zet a a ni, an ti.

MSU chuan Zirlai pawl an nih angin Ram leh Hnam chhan nan chuan a tawp an thleng zel thin an ti a. MZU chuan an zirlaipui ngeiin an unaute chimihna tur atan tha a thawh chungchangah MSU chuan 'tui aiin thisen buk a rit zawk' tih hre turin Mizo Zirlaite an chah nawn a, he thil thleng hi MSU chuan a en liam mai mai dawn lo a ni tih zirlaite a chah bawk.