Mizoram Governor P.S. Shreedharan Pillai chuan Mizoram University-in hun reilote chhunga North East mai nilo, India ram chhunga university thang chak ber pawl a ni thei chu lawmawm a tih thu a sawi a. Mizoram dung leh vang a fan chhuah thu leh mi chi hrang hrang; eizawnna inang lo tak tak leh dinhmun inang lo tak tak te a kawm nual tawh thu a sawi a. “Mizoramah hian ram leilung hauhsakna tam tak, la haichhuah loh a awm a; a chhunga chengte pawh hian theihna sang an nei a. Mizoramin theihna nasa tak a neih lai hian tuna state dinhmun chu a tha tawk lo hle a. Ei leh bar intodelhna kawngah leh state sum thawhchhuah kawngah pawh nasa taka tan lak la ngai a, thalai theihna sang tak nei te hi an rawn pen chhuah a ngai a ni,” a ti.

MZU Convocation vawi 14-na chu hripui len vangin nikum a hman theih loh a nih hnuin kuminah Convocation vawi 14 leh 15-na hi a rual a hman a ni a. Covid-19 hri leng darh zel tura laka invenna leh sawrkar inkaihhruaina zawm a tul a vangin kum dang ang loin he hunah hian Gold Medalists, Ph.D dawngtute leh Book prize winner te chauh tel tir an ni a. Sawrkar thuchhuah zawmin Degree dawngtute tawiawmtu an tel thei lo a; MZU hnathawk zingah pawh a tlem thei ang ber kalkhawm tur a ruahman a ni a, online a en theih turin live a pekchhuah a ni.

Mizoram University hi kum 2000 kum a din niin, National National Assessment and Accreditation Council (NAAC) chuan 2019 leh 2024 inkar atan Grade 'A' a pe a. National Institution Ranking Framework (NIRF) in ramchhunga university tha a thlanchhuah zingah kum 2020 atan Mizoram University chu 67- a dah mek a ni. Convocation vawi 14 leh 15-na ah hian Mizoram University Vice Chancellor Prof. K.R.S. Sambasiva Rao chuan zirlai hlawhtling mi 9740 hnenah Degree a pe thar a. Heng zinga mi 167 te chu a hmuna Degree dawng turin an rawn tel thei a. Degree dawng tura Convocationa rawn tel thei mi 167 zingah hian Doctor of Philosophy dawngtu mi 98, Gold Medalist 63 leh Book Prize Winner mi 6 an awm. Mizoram Governor P.S. Shreedharan Pillai, Mizoram University Vice Chancellor Prof. K.R.S. Sambasiva Rao leh MZU Registrar, Prof.Lalnundanga ten Degree leh award te hi an sem a ni.