ZALEN, Mar. 25, 2025: Mizoram University (MZU) Professor Dr. James LT. Thanga chuan sorkarin Year of Consolidation (inrenchem kum) a puan chu hlawhtling lova a ngaih thu leh ‘slogan pakhat lekah a ngaih theih’ tih a sawi a. Budget pharh tak pawh, “Kei chuan mipui budget ka ti ngam lo,” a ti bawk.

Thawhlehnia Congress Bhavan-a Mizoram Pradesh Congress-in Mizoram Budget 2025-26 zirchianna a huaihawtah Dr James LT. Thanga hian hun a hmanpui.

MZU mi thiam hian sawrkar kum kal mekah hian Year of Consolidation puan chu nakumah a nghawng a lang dawn tih a sawi a. “Tuna a lan dan chuan sawrkar hnathawk hlawh leh inrelbawlna hi inrenchem kum berah hian Rs. vaibelchhe 1,500 zetin a pung a ni,” a ti.

“Sawrkar hnathawk hlawh leh pension hlawhte hi chu thunun theih loh thil, pek ngei ngei ngai a ni a, a bak lirthei leina, chetvelna leh huau huau atana sum hman thunun theihah vaibelchhe sang chuangin a pung a, sawrkar hi a inrenchem lo hle niin a lang, a pung nasa hle,” a ti.

“Kum kal mekah hian sawrkar sum hmuh aia hman ral a punna hi a sang hle a, revenue deficit kan nei bawk a; chuvangin, Year of Consilidation hi a hlawhtling lovah a ngaih theih,” a ti.

Dr James-a chuan sawrkar kal lai chu a vanneiin sum a hmu tha a, sorkar laipuiin atang pawhin a hmu tha a, an beisei aiin Rs. vaibelchhe 900 chuang an hmu niin a sawi a, “Chutih lai chuan sum puk tura ruahman hi Rs. vaibelchhe 1,992 a nih laiin an ennawnaah chuan Rs. vaibelchhe 2,065 lai an puk belh dawn a, tun sawrkar kuma kan sum puk hi sawrkar kum khat chhunga kan sum puk tam ber tum a ni,” a ti.

“Kan sum hmuh zawng zawng aia kan hman ral (fiscal deficit) pawh hi a tam ber kum a ni a. Chuvangin, Year of Consolidation hi slogan pakhat ang lekah a ngaih theih,” a ti.

Congress Treasurer Dr Lalmalsawma Nghaka kaihruai budget zirhonaah hian Dr James-a chuan budget pharh tak sawi langin, “Sawrkarin hnathawhna tur a neih hi Rs. vaibelchhe 2,235.80 a ni a, mipui rawngbawlna tur, agriculture leh rural development department-ah nikum aiin sum dah a tlem a. Social services an tih - health, education, PHE leh PWD-ah kum kal mek aiin Rs. vaibelchhe 874 zetin an dah tlem bawk a, indaih lo tur department an awm a ni,” a ti.

“Mipui chan ve tur a tlem avang hian ‘mipui budget a ni’ ka ti ngam lo,” a ti bawk.

Dr James-a hian Year of Consolidation hi kum 2015-2016 atangin mipuiin an hmelhriat nia sawiin a dawt leh kumah nghawng tha a nei tih a lang tih a sawi a. “Hei hi Congress Bhavan a nih vanga sawi ka ni lo va, a number ka sawi mai a ni,” a ti.

Dr. James-a hian Zirtawpni khan MNF party chuan Hnam Rûn chhung inkhawmah thu sawiah an lo sawm tawh bawk.