Aizawl: Naktuk Pathianni hi Naupang Sunday School Inkhawmpui Ni a ni a, Presbyterian Kohhran hnuaia Pastor Bial hrang hrangah hman a ni dawn. 

Naupang Inkhawmpuiah hian Pathian thu, hla leh thu inchhang hmangin inelna neih a ni ang a. Heng bakah hian naupangten item hrang hrang a remchan dan angin an nei bawk thin.

Naupang Inkhawmpui hi bial tam zawk chuan intihsiakna atan an hmang a, bial thenkhat erawh chuan intihsiak lovin an hmang thin thung.

Naupang Inkhawmpui hi a tirah chuan missionary-te thahnemngaihnaa tan a ni a. Kum 1931 khan Aizawl Tlangnuam Kohhranah neih a ni a, hei hi a hmasa ber nia hriat a ni.

Tun hma chuan bial hrang hrangin an remchan hunah an nei mai thin a, tun hnai deuh atang a rual neih a nih theih nan Mizo Sunday School Union (MSSU)-in Sunday School zirlai syllabus-ah inkhawmpui hun tur an ruahman tel ve ta a ni. September Pathianni vawi hnihnaah Beginner leh Sacrament Department inkarte inkhawmpuiin Pathianni vawi thumnaah Senior Department an inkhawmpui thin thung.